O‘zbekiston Prezidenti Shavkat Mirziyoyev 30-yanvar kuni Islom Karimov haykali poyiga gulchambar qo‘ydi. Bu haqda Prezident matbuot xizmati xabar berdi.
Prezident Shavkat Mirziyoyevning e’tibori va tegishli qarori bilan O‘zbekistonning Birinchi Prezidenti Islom Karimov xotirasi abadiylashtirildi, hurmati joyiga qo‘yildi. Birinchi Prezident tavallud topgan 30-yanvar kunini nishonlash ezgu an’anaga aylandi.
“Bu sanani munosib o‘tkazish bizning o‘z tariximizga, mustaqilligimizga bo‘lgan hurmatimizni, xalq, millat sifatidagi madaniyatimiz va saviyamizni namoyon etadi” — degan edi Shavkat Mirziyoyev.
Gul qo‘yish marosimida Prezident Administratsiyasi, parlament palatalari va hukumat a’zolari, ilm-fan va madaniyat namoyondalari, ziyolilar, shahar jamoatchiligi ishtirok etdi.
Birinchi Prezidentning Samarqand va Qarshi shaharlaridagi haykallari poyiga ham gullar qo‘yildi.
Qur’oni Karimdan tilovat qilindi. Islom Karimovning serqirra faoliyati, olijanob insoniy fazilatlari yodga olindi.
Izoh (0)