Jizzax viloyati umumta’lim maktablarida kuz-qish mavsumida ham o‘quvchilarning sifatli bilim olishi, sport bilan muntazam shug‘ullanishi uchun zarur sharoit yaratish borasida muayyan ishlar amalga oshirilmoqda. O‘zA muxbiri qishloq maktablarida ham shundaymi, degan savolga javob izlab Sharof Rashidov tumanida bo‘ldi.
Tuman xalq ta’limi bo‘limi rahbari Durbek Nosirovning ta’kidlashicha, tumandagi 59 ta umumta’lim maktabida 38 mingdan ortiq o‘quvchi ta’lim oladi. Kuz-qish mavsumida ham o‘quvchilarga zarur sharoit yaratish maqsadida 200 tonna ko‘mir, 590 tonna ko‘mir briketi jamlangan.
Bu ishlar taqsinga loyiq, ammo o‘sha yoqilg‘ining sifatiga kim javobgar? Nega maktab ma’muriyati bilaturib sifatsiz ko‘mir briketi olishga majbur bo‘lmoqda?
Bugungi kunda qishloq joylardagi maktablarni isitish borasida muammolar uchrab turibdi. Masalan, Sh.Rashidov tumanidagi 52-umumiy o‘rta ta’lim maktabida. Eski idora binosida 1998-yildan buyon faoliyat yuritib kelayotgan 100 o‘rinli maktabda 78 nafar o‘quvchi ta’lim-tarbiya olmoqda. Xonalar sovuqligidan o‘quvchilar ustki kiyimlari bilan o‘tirishga majbur.
— Ayni paytda xonalarni isitishda qiyinchiliklarga duch kelayapmiz, — deydi o‘quv ishlari bo‘yicha direktor o‘rinbosari G‘ulom O‘sarov. – Sababi, “Jizzax“ ko‘mir omboridan olingan 35 tonna ko‘mir briketining (agar shunday atash mumkin bo‘lsa) 80 foizi yo‘lda maydalanib, bir uyum sifatsiz ko‘mir qumiga aylandi. Natijada elakdan o‘tkazib, yoqishga yaroqlilarini terib olishga majburmiz. U ham bo‘lsa yaxshi isitmaydi. Kuniga 3 ta qozonxonaga 98 kilodan ko‘mir briketi yoqamiz. Ammo ko‘rib turganingizdek, xonalar sovuq.
Yana bir jihat e’tiborni tortdi. Qishda o‘quvchilarga jismoniy tarbiya darsida shashka, shaxmat va stol tennisi o‘tilar ekan, xolos. Axir maktabda sport zali bo‘lmaganidan keyin nima ham qilsin qishloq yoshlari...
Izoh (0)