Venesuela hukumati “Adolat uchun” partiyasining sobiq a’zosi Lius Parra Milliy assambleya (parlament)ning yangi raisiga aylanganini e’lon qildi, deya xabar bermoqda Meduza.
Reuters’ning xabar berishicha, muxolifatchi deputatlar 2019-yil yanvaridan beri parlamentga raislik qilib kelayotgan Xuan Guaydoni qayta saylash niyatida edi. Biroq ularning aksariyati Karakas markazida xavfsizlik kuchlari tomonidan qo‘yilgan to‘siqlar sabab parlament majlisiga yetib bora olmagan.
Muxolifat vakillarining aytishicha, Venesuela hukumati “parlament to‘ntarishi”ni amalga oshirgan. Xuan Guaydoning matbuot xizmati parlamentning yangi raisi saylangani haqidagi qaror kvorum yo‘qligi bois noqonuniy deb topilishi haqida bayonot bergan.
Hukumat tomonidan parlamentning yangi raisi deb tanishtirilayotgan Luis Parra korrupsiyada ayblanib, “Adolat uchun” partiyasidan chetlatilgan edi, biroq uning o‘zi ushbu ayblovlarni rad etib keladi.
2019-yil yanvarida Venesuelaning muxolifatchi parlamenti yetakchisi Xuan Guaydo o‘zini mamlakat prezidenti vazifasini vaqtincha bajaruvchi deb e’lon qilgan edi. Uni AQSh va Lotin Amerikasining aksariyat mamlakatlari qo‘llab-quvvatlagan edi. O‘z navbatida, Rossiya va Xitoy Venesuela prezidenti Nikolas Maduroni qo‘llashini bildirgan. Shundan so‘ng mamlakatda ko‘plab norozilik namoyishlari yuz berib, namoyishchilar Guaydoni olqishlab chiqqan edi.
Izoh (0)