Qozog‘istonning Olmaota shahridagi “Ko‘kto‘be” parki hududidagi “Katapulta” attraksionidagi nosozlik tufayli 13 yoshli bola yiqilib tushdi hamda jarohat oldi, deb xabar berdi Tengrinews.
Bolakay xavfsizlik kamaridan uchib chiqib ketgan va yerga qulagan. Baxtsiz hodisa oqibatida bolaning oyoqlari singan.
Bolaning ota-onasi u o‘zining ehtiyotsizligi oqibatida jarohatlangani hamda hech kimga hech qanday e’tirozi yo‘qligini bildirgan.
Mahalliy politsiya holat yuzasidan surishtiruv boshlagan. Agar attraksion egasi aybdor deb topilsa, u katta miqdorda jarima to‘lashi kerak bo‘ladi.
Eslatib o‘tamiz, Yangi yilning ikkinchi kunida O‘zbekistonda ham shunga o‘xshash baxtsiz hodisa yuz berdi.
Farg‘onadagi Al-Farg‘oniy nomidagi istirohat bog‘ida 2-yanvar, payshanba kuni Booster Max nomli attraksion ishlab turgan vaqtida uning boltlari yechilib, detallaridan biri chiqib ketgan. Ushbu detal attratsionda uchayotgan 32 yoshli N.Yu. ismli ayolning boshiga kelib tushgan.
Ayol tan jarohati olib, Respublika shoshilinch tibbiy yordam ilmiy markazi Farg‘ona filialiga olib borilgan va ko‘rsatilgan tibbiy yordamga qaramay vafot etgan.
Izoh (0)