Qashqadaryo viloyat IIB Yo‘l harakati xavfsizligi boshqarmasi xodimlari haydovchilarni 8-dekabr davlat Konstitutsiyasi qabul qilingan kun munosabati tabriklab, kitob sovg‘a qilmoqda. Bu haqda “Daryo”ga Qashqadaryo IIB YHX boshqarmasi axborot xizmati rahbari Javlon Baxtiyev ma’lum qildi.
Ma’lum bo‘lishicha, yo‘l inspektorlari bugun, 6-dekabr kuni viloyat miqyosida “reyd” tadbirlari tashkil etib, haydovchilarni bayram bilan qutlagan.
“8-dekabr davlat Konstitutsiyasi qabul qilingan kun munosabati bilan xodimlarimiz haydovchilarga yaxshi kayfiyat ulashishni maqsad qildi va haydovchilarni birin-ketin to‘xtatib, davlat Konstitutsiyasini sovg‘a qilmoqda hamda yurtimizda qonun ustuvorligini ta’minlashda fuqaro sifatidagi ishtiroki nihoyatda muhimligi aytilib, hamkorlikka chorlandi”, — deydi Javlon Baxtiyev.
Qayd etilishicha, inspektorlar Abdulla Oripov nomidagi ijod maktabi hamda Qarshi davlat universitetida ham bo‘lib, yoshlar bilan Konstitutsiya haqida suhbatlashgan.
Aytilishicha, viloyatda ushbu tadbir bayramga qadar davom etadi. Bu kabi tadbirlar barcha viloyatlarda o‘tkazilishi rejalashtirilgan.
Izoh (0)