Joriy yilning avgust oyida Toshkentdagi Mont Blanc plastik jarrohlik klinikasida 5 kun ichida ikki bemor ayol vafot etgani haqida xabar berilgandi. Bosh prokuraturaning ma’lum qilishicha, avgust oyining o‘zida ushbu klinikada jarrohlik amaliyotini o‘tkazgan uch kishi vafot etgan.
Birinchi holat: 1-avgust kuni Toshkent shahar Shayxontohur tumanida joylashgan Mont Blanc xususiy shifoxonasida fuqaro U.Baxranovga burun qiyshiqlarini to‘g‘irlash yuzasidan jarrohlik amaliyoti o‘tkazilganidan so‘ng, bemorning sog‘lig‘i yomonlashganligi sababli 20-avgustda Moskva shahrida joylashgan shifoxonaga yotqizilgan. Biroq unga ko‘rsatilgan tibbiy muolajalarga qaramasdan U.Baxranov vafot etgan.
Ikkinchi holat: 15-avgust kuni Qozog‘iston fuqarosi L.Apostolovaga Mont Blanc xususiy klinikasida tashqi burun deformatsiyasi va burun to‘sig‘i qiyshayishini to‘g‘irlash bo‘yicha jarrohlik amaliyoti o‘tkazilgan hamda burun to‘sig‘i qiyshayishi to‘g‘irlangan.
Jarrohlik amaliyotidan so‘ng bemor mustaqil nafas olishga o‘tkazilgan va unga antibakterial davo maqsadida “Seftriakson” dori vositasi ichki qon tomiri orqali 1,0 ml. miqdorida yuborilgan. Shundan so‘ng, bemorning ahvoli keskin og‘irlashgan va chuqurlashtirilgan tekshirishlar o‘tkazish maqsadida Respublika shoshilinch tibbiy yordam ilmiy markaziga olib borilgan.
19-avgust kuni markaz shifokorlari tomonidan ko‘rsatilgan tibbiy muolajalarga qaramasdan L.Apostolova shifoxonaning jonlantirish bo‘limida vafot etgan.
Uchinchi holat: 24-avgust kuni Mont Blanc xususiy klinikasida fuqaro G.Sharifovaga burun sohasida jarrohlik amaliyoti o‘tkazish vaqtida unga yuborilgan narkoz noto‘g‘ri ta’sir qilishi natijasida ahvoli og‘irlashgan. Natijada shu kunning o‘zida bemorning yaqin qarindoshlari tomonidan Akfa medline xususiy shifoxonasiga (klinik o‘lim holatida) olib kelingan.
26-avgust kuni shifokorlar tomonidan tibbiy muolajalar ko‘rsatilganligiga qaramasdan G.Sharifova shifoxonaning jonlantirish bo‘limida vafot etgan.
Mazkur holat bo‘yicha to‘plangan hujjatlar Bosh prokuraturada o‘rganilib, 12-noyabr kuni Jinoyat kodeksining 116-moddasi (Kasb yuzasidan o‘z vazifalarini lozim darajada bajarmaslik) 4-qismi “a,b” bandlari bilan jinoyat ishi qo‘zg‘atilgan. Hozirda ushbu jinoyat ishi bo‘yicha Shayxontohur tuman prokuraturasida dastlabki tergov harakatlari olib borilmoqda, uning borishi Bosh prokuratura tomonidan nazoratga olingan.
Bundan tashqari, tuman prokuraturasi tomonidan yuqoridagi kabi holatlarni kelgusida sodir etilishini oldini olish bo‘yicha Sog‘liqni saqlash vaziriligiga taqdimnoma kiritilgan.
Izoh (0)