O‘zbekiston XDP va “Milliy tiklanish” partiyalari Jahongir Ortiqxo‘jayevning jurnalistlarni yo‘q qilish tahdidi aks etgan audioyozuvga munosabat bildirdi.
“Joriy yil 16-noyabr kuni ijtimoiy tarmoqlar va internet OAVda Toshkent shahar hokimi Jahongir Ortiqxo‘jayevga tegishli ekani aytilayotgan, jurnalist va blogerlar sha’niga o‘ta keskin fikrlar bildirilgan, sharmanda qilish, hatto jismonan yo‘q qilish bilan tahdid qilingan audioyozuv keng tarqaldi. Bu holat mamlakatimizdagi barcha OAV vakillari, blogerlar va keng jamoatchilikning qattiq munosabati va tanqidiga sabab bo‘ldi.
Davlatimizdagi huquqni muhofaza qiluvchi idoralar zudlik bilan ushbu audioyozuv bo‘yicha surishtiruv ishlarini olib borishi, voqea qachon, qayerda, kimlar bilan sodir bo‘lganini aniqlanishi hamda qonunda belgilangan tartibda boshqa choralarni ko‘rishi zarur.
Audioyozuvdagi holat haqiqatda ro‘y bergan bo‘lsa, demokratik islohotlarning eng muhim sharti – so‘z va fikr erkinligiga, jurnalistlarga ochiqdan-ochiq tahdid qilish, “menga hamma narsa mumkin”, deb o‘ylash, avvalo, xalq va davlatni mensimaslik, deb baholanishi kerak.
Xalq demokratik partiyasi kasbi, faoliyat turi, ijtimoiy holatidan qat’i nazar, har bir insonning ustuvor huquqlari to‘liq kafolatlanishi va amalda ta’minlanishi zarur, deb hisoblaydi. Mutasaddi idoralardan tez orada aniq va rasmiy ma’lumotlarni kutadi”, — deyiladi O‘zbekiston XDP Markaziy kengashi bayonotida.
“Milliy tiklanish” partiyasi rahbari Alisher Qodirovning fikriga ko‘ra, audioyozuv haqiqiyligi isbotlanmaguncha ushbu vaziyatga izoh berish noto‘g‘ri.
“Toshkent shahar hokimi Jahongir Ortiqxo‘jayev ovozi bilan ijtimoiy tarmoqlarda tarqatilayotgan audioyozuvning haqiqiyligi tasdiqlanmagunicha ushbu masalada fikr bildirishni to‘g‘ri deb hisoblamaymiz.Mavzu bo‘yicha birinchi bo‘lib izoh yoki bayonot berish Jahongir Ortiqxo‘jayev va xabarning muallifiga tegishlidir.
Shu o‘rinda jamiyat axborot iste’mol madaniyatining piramida shaklidagi uchta darajasi haqida aytib o‘tmoqchiman:
Birinchi, eng quyi va eng ko‘p qatlam - axborotni eshitadi va shundayligicha iste’mol qiladi;
Ikkinchi, o‘rta-o‘zgaruvchan, kamayishga moyil qatlam - axborotni eshitadi, o‘zini darajasida tahlil qiladi, munosabat bildirmaydi;
Uchinchi, eng kam, jamiyatni siyosiy tafakkurini ko‘rsatadigan qatlam - axborotni eshitadi, tekshirib-tahlil qiladi va munosabat bildiradi.
Jamiyatning mafkuraviy va siyosiy immunitet darajasi uchinchi qatlamning darajasiga tengdir”, — deb yozadi Alisher Qodirov o‘z Facebook sahifasida.
16-noyabr kuni ijtimoiy tarmoqlarda Toshkent shahar hokimi Jahongir Ortiqxo‘jayevning jurnalistlarni yo‘q qilish tahdidi aks etgan audioyozuvi tarqaldi. “Adolat” sotsial-demokratik partiyasi birinchilardan bo‘lib ushbu audiyozuvga munosabat bildirdi. Partiya holatni inson huquqlari va uning sha’ni, qadr-qimmati, daxlsiz huquqlarining buzilishi deb hisoblashini ma’lum qildi.
Keyinroq AOKA audioyozuv bo‘yicha o‘rganish olib borilayotgani hamda o‘rganish natijasida tegishli choralar ko‘rilishini ma’lum qildi.
Mavzuga doir:
Izoh (0)