O‘zbekiston Ichki ishlar vazirligi tomonidan “Bayrog‘imiz – faxrimiz, g‘ururimiz” shiori ostida yarim marafon va gala-konsert tashkil etilmoqda. Bu haqda IIV axborot xizmati xabar berdi.
Mazkur tadbir O‘zbekiston davlat bayrog‘i qabul qilinganligining 28 yilligini keng nishonlash, davlat ramzlariga nisbatan hurmat tuyg‘ularini yanada yuksaltirish, “Beshta muhim tashabbus” doirasida tizimda amalga oshirilayotgan ishlar ko‘lamini kengaytirish, ichki ishlar organlari shaxsiy tarkibi o‘rtasida sog‘lom turmush tarzini targ‘ib etish hamda sportni ommalashtirish maqsadida o‘tkazilmoqda.
Tadbirning birinchi qismi bo‘lgan yarim marafonning ochilish marosimi 17-noyabr kuni soat 14:30 da Toshkent shahrining Oybek va Nukus ko‘chalari kesishmasida tashkil etilib, shu yerning o‘zida marafonga start beriladi. Marafon ishtirokchilari “Humo Arena” muz saroyi maydonida kutib olinadi hamda g‘oliblar taqdirlanadi.
Tadbirning ikkinchi qismi Ichki ishlar vazirligining ansabli hamda mashhur san’atkorlar ishtirokidagi gala-konsert soat 16:00da “Humo Arena” muz saroyining ko‘cha maydonida bo‘lib o‘tadi.
Shuningdek, “Humo Arena” muz saroyining ko‘cha maydonida Ichki ishlar vazirligi tomonidan mazkur tadbirga bag‘ishlangan kitobxonlar sayli va idoraviy maxsus texnika vositalarining ko‘rgazmasi tashkil etiladi.
Izoh (0)