Toshkent shahri hokimi Jahongir Ortiqxo‘jayevning 16-noyabr kuni muxbirlarga qilgan tahdidi audiosi internetda tarqaldi. Audioda Ortiqxo‘jayev jurnalistlarni sharmanda qilish, hattoki jismonan yo‘q qilib yubora olishga qodirligi bilan tahdid qilgan.
Mazkur tahdid shahar hokimidan Olmazor tumani hokimining sobiq o‘rinbosari Abdurasul Vahobov bilan bog‘liq voqeaning ertasiga “Kun.uz” muxbirlari Rahmatilla Isroilov, Sherzod Egamberdiyev va Bahodir Ahmedov hokim qabulida bo‘lgan chog‘da yangragan. Toshkent shahar hokimi Abdurasul Vahobov va muxbirlarni o‘z huzuriga chorlab, yarashtirmoqchi, o‘rtadagi tushunmovchilikni hal qilmoqchi bo‘lgan. Tomonlar murosa qila olmagach, uchrashuv tahdidli “tarbiyaviy soat”ga aylanib ketganligi ma’lum qilindi.
Tahririyat hokim bilan uchrashuv vaqtidagi audioyozuvni Abdurasul Vahobov va “Kun.uz” o‘rtasidagi nizoli vaziyat qasd olishga aylanib ketmasligi hamda shahar hokimining obro‘-e’tiboriga putur yetkazmaslik uchun ommaga oshkor qilish fikridan voz kechgan edi. 16-noyabr kuni ijtimoiy tarmoqlarda shu voqeaga oid audioyozuv tarqalishiga esa tahririyatning aloqasi yo‘q.
Mavzuga doir: Bosh prokuratura va Toshkent shahar hokimligi Jahongir Ortiqxo‘jayev bilan bog‘liq audioyozuv bo‘yicha bayonot bilan chiqdi
Ma’lumot uchun, Jahongir Ortiqxo‘jayevning so‘zlari yozib olingan to‘liq formatdagi audioyozuvlar Kun.uz tahririyatida mavjud bo‘lib, belgilangan tartibda ko‘rib chiqish uchun Bosh prokuraturaga taqdim etilishi mumkin.
Izoh (0)