Turkmanistonda yuzlab odamlar O‘zbekiston vizasini olish uchun navbat kutmoqda

O‘zbekistonning Turkmaniston poytaxti Ashxaboddagi elchixonasida viza olish uchun turnaqator navbatlar yuzaga kelgan. Har kuni erta tongdan diplomatik vakolatxona yonida viza uchun hujjat topshirish niyatida bo‘lgan yoki tayyor stikerni olib ketish uchun kelgan turkmanistonlik fuqarolar navbatga turmoqda. Bu haqda “Turkmen.news” xabar berdi.

2019-yil yanvar–iyun oylarida O‘zbekistonga Turkmanistondan 233 ming fuqaro tashrif buyurgan. O‘zbekistonga kelishdan asosiy maqsad xalq iste’moli uchun mahsulotlar sotish va mahalliy bankomatlardan pulni naqdlashtirish ekani qayd etilgan. Valyuta dardidagi turistlarning oqimini Turkmaniston migratsiya xizmati va Tashqi iqtisodiyot banki ushlab qolishga, fuqarolarni mamlakatda olib qolish uchun yangi taqiqlar o‘ylab topishga urinmoqda.

Navbatda turgan erkaklardan biri bankomatlardan o‘zi, qarindoshlari, tanishlari va tanishlarining tanishlari uchun valyutani naqdlashtirish maqsadida ko‘p martalik viza olib 20 kunga O‘zbekistonga kelib ketmoqchi. U fuqarolarning kartalaridagi valyutani mahalliy do‘konlardagi sotuvchilardan 50 AQSh dollarini foiz hisobiga kartasidan naqdlashtirib, mijozlariga 40–45 dollar yechib bermoqda.Shu sababli O‘zbekistonga qatnayotgan “ucharlar”ga odamlarning o‘zi kartalarini berib, PIN-kodlarni aytmoqda. Ular 100–150 manat evaziga Turkmanistonga valyuta olib kelib bermoqda va dollarlar “qora bozor”da qayta naqdlashtirilmoqda. Shirberdi vizasi bilan O‘zbekistonga besh marta chiqib kelgan, viza va yo‘lkira harajatlaridan tashqari bir hafatalik ro‘zg‘or uchun ham foyda qilgan. U bu biznes bilan bir yildan beri shug‘ullanib keladi.

“Valyuta turistlari” orasidagilarning hammasi Shirberdi kabi ishsiz emas. Ko‘pchilik davlat xizmatlarida ishlaydi, O‘zbekistonga chiqib kartadan valyuta yechishni esa mehnat ta’tili vaqtida yoki dam olish kunlarida amalga oshiradi.

Avval xorijga chiqishni istagan fuqarolar Turkmaniston migratsiya xizmatiga 2 mingdan 5 minggacha AQSh dollarida pora berayotgani, xizmatda xorijga chiqmaydigan odamlarning “qora ro‘yxati” borligi, shuningdek, Ashxobodda uyini sotib boshqa yerga ko‘chib ketmoqchi bo‘lganlarning amladorlarga pora berishga majbur bo‘layotgani haqida xabar qilingan.