Eronda katta YTH oqibatida 28 nafar odam halok bo‘ldi

Eron janubi-sharqida yuz bergan katta yo‘l transport hodisasi oqibatida yigirma sakkiz nafar odam qurbon bo‘ldi. Bu haqda Mehr agentligi ma’lumotiga tayanib “RIA Novosti” xabar berdi.

“14-noyabr tongida ichida noqonuniy yo‘l bilan mamlakatga kirgan mehnat muhojirlari bo‘lgan ikkita pikapning to‘qnashuvi oqibatida 28 nafar odam halok bo‘ldi, 21 nafar muhojir jarohatlandi”, — deyiladi Mehr agentligining mahalliy tibbiyot xizmatlariga asoslanib bergan xabarida.

YTH Pokiston va Afg‘oniston bilan chegara hududidagi Belujiston va Siston viloyatlari oralig‘ida sodir bo‘lgan. Halok bo‘lganlarning qaysi davlat fuqarolari ekanligi haqida rasmiy ma’lumot berilmagan. Ayrim nashrlar ularning Afg‘oniston fuqarolari ekani haqida yozgan.Avval Saudiya Arabistonida avtobusning yuk mashinasi bilan to‘qnashuvidan keyin sodir bo‘lgan yong‘inda 36 nafar ziyoratchi, Nepalda daryoga qulagan avtobusda 15 nafar yo‘lovchi hamda Peruda quyuq tuman sharoitida avtobusning jarlikka qulashi oqibatida 19 nafar, Slovakiyadagi avariyada esa 12 nafar odamning halok bo‘lgani haqida xabarlar berilgan. Shuningdek, 8-noyabrda Toshkent viloyatida ikkita Isuzu avtobusi ishtirokidagi avtohalokat tafsilotlari haqida ham yozilgan.