Toshkent viloyati Bo‘stonliq tumani, Chorbog‘—Sijjak yo‘lida joylashgan Burchmulla o‘rmon xo‘jaligiga qarashli ochiq maydonda yong‘in sodir bo‘ldi. Davlat yong‘in xavfsizligi xizmati xabariga ko‘ra, yong‘in haqida 21-oktabr kuni soat 13:40 da xabar kelib tushgan.
Yong‘inni bartaraf etishga 3 ta yong‘in o‘chirish bo‘linmalari, 3 ta suv tashuvchi maxsus texnikasi va o‘rmon xo‘jaligining 100 nafarga yaqin ishchi-xizmatchilari jalb etilgan.
Birinchi bo‘linmalar chaqirilgan manzilga 20 daqiqada yetib borgan (eng yaqin yong‘in-qutqaruv qismigacha masofa 10 kilometr). Ko‘rilgan tezkor harakatlar natijasida yong‘in soat 14:37 da o‘rab olingan va 15:10 da bartaraf etilgan.
Tan jarohati olganlar va halok bo‘lganlar qayd etilmagan. Yong‘in oqibatida 20 gektar ochiq maydonda quruq o‘t, shox-shabba va daraxtlar yongan.
Yong‘in ochiq olovdan foydalanishda ehtiyotsizlik oqibatida kelib chiqqan deb taxmin qilinmoqda.
Izoh (0)