AQSh kongressidagi respublikachilar guruhi yetakchisi Mitch Makkonell mamlakat prezidenti Donald Trampning Suriya hududidan amerikalik harbiylarning chiqib ketishi haqidagi qarori “jiddiy strategik xato” ekanligini ta’kidladi, deb yozmoqda “TASS”.
“AQSh qo‘shinlarining Suriya hududidan chiqarib yuborilishi — jiddiy strategik xato. Amerika harbiylarining Suriyadan chiqib ketishi, Barak Obama bir vaqtlar Iroqda qilgan xatoning takrorlanishi bo‘ldi. O‘shanda bunday qaror sabab IShIDning paydo bo‘lishiga sharoit yaratilgandi.
Besh kunlik tinchlik sulhi e’lon qilingan bo‘lsa ham AQSh qo‘shinlari IShID va boshqa terrorchilar guruhlaridan ancha uzoqlashib ketgan. Bizning chekinishimiz Suriyada Bashar Asadning shafqatsiz hukmronligi va Eron tarafdorlarining hududda boshqaruv o‘rnatishiga olib keladi. Rossiyaning Suriyada o‘z ta’sir doirasini kengaytirib borayotganligini ham qoralaymiz”, — deya ta’kidlagan senator.
Makkonellning fikricha, AQSh Turkiya bosqinini to‘xtatishi va o‘t ochishni to‘xtatib turish muddatini yana uzaytirishi hamda o‘z qo‘shinini takroran Suriyaga kiritishga urinishi lozim. Shuningdek, Qo‘shma shtatlar hukumati Turkiyaning Rossiyadan uzoqlashishi va NATOga qaytishiga sharoit yaratishi zarur.
Izoh (0)