Yigirma yil avval tojikistonlik Jam Jo‘raboyev o‘zi ma’mur bo‘lib ishlaydigan Turkiyadagi internet-klub poliga o‘rnatilgan karton qutilarda tunab yurardi. Hozirda u dunyodagi eng xaridorgir konsept-dizaynerlardan biri va Jorj Lukas hamda Marvel qahramonlari qiyofasini yaratmoqda.
Jam Jo‘raboyevning hayoti ham Gollivud filmlari ssenariysini eslatadi: tug‘ilib-o‘sgan yurti Tojikistondan fuqarolar urushi payti bosh olib ketgan, Turkiyada muhtojlikdan aziyat chekkan, uyga qaytgan va Ustodesign kompaniyasida dizayner sifatida ish boshlagan.
Jo‘raboyev Ustodesign jamoasi bilan ta’lim loyihalari va professional musobaqalarni yoritib boradigan Cgsociety loyihasi saytida e’lon qilingan konsept-dizaynerlar uchun tanlovda ishtirok etishga qaror qildi. Jamoaga eng yaxshi video-prodakshn uchun mukofot berildi.
Ushbu g‘alabadan so‘ng Jam Moving Picture Company (MPC) kompaniyasi London bo‘linmasi prodyuseridan maktub oldi va uning taklifiga binoan 2011-yil oktabrida Britaniya poytaxtiga keldi. U MPC reklama komandasi bilan loyihani ikki oy ichida yakunladi va Tojikistonga qaytib ketdi. Yana yarim yil kompaniya bilan frilanserlik asosida hamkorlik qildi.
MPC kompaniyasidagi faoliyat Jo‘raboyev oldin ijodini faqat forumlarda kuzatgan konsept-dizaynerlarning yopiq olamiga eshik ochdi. 2014-yilda u haqda “Garri Poter”, “O‘rgimchak-odam” va boshqa filmlar uchun vizual effektlar yaratgan Framestore kompaniyasi xabar topdi. Framestore Jo‘raboyevga u orzu qilgan kino bo‘limida ish va yiligi 60 000 funt (o‘sha paytda 90 ming dollar) maosh taklif qildi.
Ikki yil ichida Jam Framestore’da “Qasoskorlar: Altron asri”, “Yura davri dunyosi”, “Fantastik maxluqlar va ular qayerda istiqomat qiladi”, “Kong: bosh suyak oroli”, “Geoshtorm”, shuningdek, Stiven Spilbergning “Birinchi o‘yinchi tayyorgarlik ko‘rsin” filmlari ustida ishladi.
Hozirda Jo‘raboyev frilanser maqomida Gollivud rejissorlari buyurtmasi asosida ishlashda davom etmoqda, shuningdek, kino konsept-dizayni bo‘yicha mahorat saboqlari o‘tmoqda. Bularning barchasi unga yiliga 800 ming dollar daromad keltiradi.
Izoh (0)