Samarqandda turistik markaz qurilishi boshlandi

Samarqanddagi eshkak eshish kanali hududida turistik markaz qurilishi boshlandi.

Tadbirda Bosh vazirning birinchi o‘rinbosari Ochilboy Ramatov hamda Samarqand viloyati hokimi Erkinjon Turdimov ishtirok etdi.

Loyiha qurilishiga mas’ul Timur Soyning ma’lum qilishicha, turistik markaz ikki hududdan iborat bo‘lib, eshkak eshish kanalining shimoliy hududida zamonaviy anjumanlar saroyi, ikkita 5 yulduzli, ikkita 4 yulduzli mehmonxona va boshqa inshootlar quriladi. Mazkur hudud markazning biznes hududi hisoblanadi.

Janubiy hudud esa ichki turizm uchun mo‘ljallanib, bu yerda 6 ta mehmonxona, akvapark, sport inshootlari, restoran va kafelar, milliy mahsulotlar bilan savdo qiluvchi nuqtalar bunyod etiladi. Shuningdek, mazkur hududda dendrapark tashkil etiladi va bu yerda mahalliy aholi oilaviy kelib hordiq chiqarishi uchun imkoniyat yaratiladi. Hududda bir vaqtning o‘zida 3 ming kishi dam olishi mumkin bo‘ladi.

Sayyohlik markazi hududidagi yo‘llar, asosan, elektromobillar qatnoviga mo‘ljallanadi. Shuningdek, veloyo‘lak, piyoda sayr qilish uchun yo‘laklar bo‘ladi.

Yangi markaz qurilishi davomida eshkak eshish kanalining tabiiy shart-sharoit va imkoniyatlari saqlab qolingan holda, bu yerda yirik xalqaro musobaqalar o‘tkazish uchun qulay sharoitlar yaratiladi.

Boshlangan qurilish ishlarini 2021-yil oxiriga qadar yakunlash rejalashtirilgan.

Ma’lumot uchun, Prezident Shavkat Mirziyoyev 26-iyul kuni Samarqand viloyatiga tashrifi chog‘ida chet ellik va mahalliy sayyohlar uchun turistik markaz hamda dam olish maskanini qurish haqida topshiriq bergan edi.