Namangan shahri hokimi Shavkatjon Abdurazzoqov boshchiligidagi delegatsiya Pokistonga keldi. Bu haqda shahar hokimligi axborot xizmati ma’lum qildi.
Delegatsiya tarkibidan shahar hokimligi, ishbilarmon doiralar va Namangan muhandislik-texnologiya instituti vakillari o‘rin olgan.
O‘zbekistonning Pokistondagi favqulodda va muxtor elchisi Furqat Siddiqovning taklifiga binoan amalga oshirilayotgan safar davomida delegatsiya Panjob viloyatining Lahor va Faysalobod shaharlarida bo‘ladi. Ular bilan o‘zaro hamkorlik o‘rnatish, Namanganning eksport salohiyatini targ‘ib qilish, savdo-iqtisodiy va investitsiyaviy bitimlar ishlab chiqish, madaniy-gumanitar sohadagi aloqalarni kengaytirish ko‘zda tutilmoqda.
Shuningdek safar davomida Namangan muhandislik-texnologiya instituti va Faysaloboddagi Pokiston milliy yengil sanoat universiteti bilan hamkorlik kelishuvi imzolanishi rejalashtirilgan. Institutda kelgusida Pokiston bilan hamkorlikda O‘zbekistonda ishlab chiqarilgan tekstil mahsulotlarini jahon standartlari darajasida sinovdan o‘tkazish va sertifikatsiyalash laboratoriyasini tashkil etish rejalashtirilgan.
Panjob viloyatiga safarning birinchi kunida O‘zbekiston va Pokiston ishbilarmonlari o‘rtasida uchrashuvlar bo‘lib o‘tdi.
Ma’lumot uchun, Panjob viloyatida 110 million kishi yoki Pokiston aholisining yarmidan ortig‘i istiqomat qiladi.
Izoh (0)