O‘zA xabar berishicha, Jizzax shahri markazidan Sharof Rashidov tumaniga olib chiqadigan bir nechta yo‘l bor. Ulardan biri shaharliklar tomonidan Sarvar Azimov, tumanliklar tomonidan Shavkat Boboyev deb ataluvchi ko‘cha bilan kesishgan, na shaharga va na tumanga qarashli bo‘lgan “Nomsiz” ko‘cha.

Foto: O‘zA

Ko‘chaning chap tarafi Jizzax shahriga, o‘ng tomoni esa Sharof Rashidov tumanining Sovungarlik mahallasiga qarashli. Ushbu “Nomsiz”, shu yerda yashovchilar tili bilan aytganda, “Yangi uchastkalar” ko‘chasi “neytral zona”da joylashgan, ya’ni egasiz.

“Nomsiz” ko‘chadagi past-baland qirlar qadim zamonlardan qolmagan: u davrlarda beton va asfalt, maishiy chiqindi va yaroqsiz plastmassa idishlar, baklashkalar bo‘lmagan.

Foto: O‘zA

—“Jizzax yo‘l qurilish” degan tashkilot ko‘chamizga turli qurilish, maishiy va boshqa chiqindilarni mashina-mashina olib kelib to‘kaverib, rosmana chiqindixonaga aylantirdi, — deydi “Nomsiz” ko‘chada yashovchi fuqaro Qunduz Ummatova. — “Nega bu yerga chiqindi to‘kayapsizlar? Qaytaga ko‘chaning ikki tomoniga 2 ta chiqindi quti qo‘yib beringlar”, desak, “Opa, bu ko‘cha bizning zaxira yerimiz. To‘kkan ana shu shag‘al-u tuproqlarni boshqa kovlangan joylarga solish uchun olib ketishimiz bilan bu yerlarga tungi yoritgichlar o‘rnatib, oynadek tekis asfalt yotqizamiz”, — deyishdi. Bunga ham ancha bo‘ldi. Biz soddalar shunga ishonibmiz.

Foto: O‘zA

3 yil bo‘layaptiki, “Nomsiz” ko‘chadagi chiqindi tepaliklari soni ortsa ortayapti, balandlashsa balandlashayapti, ammo chiqindilarni olib chiqib ketish, bu joyga asfalt yotqizishdan darak yo‘q.