5—10-sentabr kunlari Toshkentda qilichbozlik bo‘yicha ikkita xalqaro musobaqa bo‘lib o‘tadi, deya xabar qilmoqda Milliy olimpiya qo‘mitasi matbuot xizmati.

Dastlabki turnir 5—8-sentabr kunlari Xalqaro qilichbozlik federatsiyasi shafeligida o‘tkaziladi. Rapira va shpaga yo‘nalishi ustalari o‘rtasida kechadigan FIE Satellite musobaqasida O‘zbekistondan tashqari Rossiya, Avstriya, Angliya, AQSh, Italiya, Singapur, Malayziya, Filippin, Braziliya, Turkiya, Gruziya, Afg‘oniston, Ozarbayjon, Turkmaniston, Qozog‘iston va Qirg‘iziston kabi mamlakatlar terma jamoalari qatnashadi.

9—10-sentabr kunlari esa Markaziy Osiyo qilichbozlik konfederatsiyasi ochiq chempionati o‘tkaziladi. Toshkentdagi gimnastika sport saroyida bo‘lib o‘tadigan musobaqada qilichbozlikning barcha yo‘nalishlari bo‘yicha janglar tashkil qilinadi.