6-avgust kuni Qashqadaryo viloyati G‘uzor tumani “Yakkadaraxt” MFY Buton qishlog‘i ko‘chasida harakatlanib ketayotgan “ZIL” rusumli yuk avtomobilida yong‘in sodir bo‘lgani, oqibatda yong‘in xonadonlardan birining tom qismiga ham o‘tgani ma’lum qilingandi. Yong‘indan jabr ko‘rgan xonadon egasi Sofiya Zikrillayeva “Daryo”ga murojaat qilib, yong‘in oqibatida yetkazilgan zarar qoplanmayotgani, mutasaddilar bunga e’tibor bermayotganidan shikoyat qildi.
Sofiya Zikrillayevaning ta’kidlashicha, o‘sha mash’um voqea yuz bergan paytda u uyida bo‘lgan.
— 6-avgust kuni soat chamasi 14:00 larda shovqin-suron boshlandi, — deydi Sofiya Zikrillayeva. – Issiq havo sababli lanj bo‘lib, ko‘zim ilingan ekan. Shovqindan uyg‘onib ketdim va derazadan qaradim. Tashqarida yuk mashinasi ko‘ringach, mol bozoriga mol olib kelganlarning mashinasi bo‘lsa kerak degan xayol o‘tdi. Shunda darvozam taqilladi. Qarasam, qo‘shnilarim. “Uyingdan chiq, yonayapti”, deyishdi. Qo‘rqib ketdim. Ko‘chaga otildim. Qarasam, uyim yonyapti. Haydovchi esa nima qilarini bilmay, u yoqdan buyoqqa qarab chopadi.
Ma’lum bo‘lishicha, haydovchi Rafayel Rasulov boshqaruvidagi “ZIL” yuk mashinasi ustiga me’yoridan ortiq somon presslar ortilgach, avtomobil harakati davomida elektr simlariga tekkan. Natijada qisqa tutashuv yuzaga kelib, yong‘in chiqqan.
— Yuk avtomobiliga haddan ortiq ko‘p ortilgan somon presslar elektr simlariga tegib, yona boshlagach ko‘rganlar “ZIL” haydovchisini ogohlantirgan, — deydi “Yakkadaraxt” MFY raisi Jonimqul Kenjayev. – Haydovchi somon presslarning ustki qismidagi yonayotgan presslarni yerga tushirgan. O‘tgan-qaytganlar “ol buni” deyishgach, yonayotgan somon presslarni chetga olguncha olov kiyimiga ham o‘tgan. “Zil” bortidagi somon presslar tobora kuchliroq yona boshlagan. Haydovchining kiyimi ham yona boshlagach, mashinani boshqarishga qiynalgan. Qolaversa, mashinada o‘rnatilgan gaz ballon portlashidan qo‘rqib, mashina rulini tashlab qochgan. Oqibatda mashina boshqaruvni yo‘qotib, Sofiya Zikrillayevaning somonxonasiga borib urilgan. Va yonishda davom etgan.
MFY raisining aytishicha, bu paytda Sofiya Zikrillayeva somonxonasida ham somon presslar bo‘lgan. Yuk mashinasi ustidagi somon presslar va somonxonadagi somon presslar qo‘shilib, dahshatli yong‘in chiqqan.
— Sofiya Zikrillayeva somonxonasidagi somon presslar va yuk mashinasidagi somon presslar birikib, dahshatli olov paydo bo‘lgan, — deydi Jonimqul Kenjayev. – Yarim soatda yetib kelgan yong‘in xavfsizligi xodimlari olovni 2 soat deganda o‘chirdi. Xayriyatki, hech kimga hech narsa qilmagan.
Uyi yona boshlaganini ko‘rgan Sofiya Zikrillayeva yordam so‘rab to‘rt tomonga chopadi. O‘zi harakatlanishda qiynalsa-da, chor atrofga yuguradi. Haydovchiga mashinani olishini, uyi yonayotganini aytib baqiradi. Natijada tobi qochib, tez yordam mashinasi keladi. Qolgani esida yo‘q. Boisi Sofiya Zikrillayeva hushini yo‘qotgandi.
Sofiya Zikrillayevaning eslashicha, u 4–5-sinflarda tahsil olib yurgan kezlari eshak sudrab ketishi natijasida oyog‘i jarohatlangan. E’tibor berilmagach, jarohat vaqti kelib o‘z so‘zini aytadi. Sofiya Zikrillayeva oyoqlaridagi jarohat sabab oqsoqlanib yuradigan bo‘lib qoladi.
— Otam-onam, jigarlarimdan yolg‘iz qoldim, — deydi Sofiya Zikrillayeva. – Yakka-yu yagonam jiyanim bor. Kambag‘alni tuyaning ustida ham it qopadi deganlaridek, hali ta’miri tugamagan uyim yonib, kul bo‘ldi. Yordam so‘rab, adolatning tiklanishidan umid qilib tuman hokimi qabuliga bordim. Hokim hatto meni eshitishni ham istamadi. To‘g‘ri, yong‘in bo‘lgan kunining ertasiga tuman hokimi boshchiligida vakillar kelishgandi. Yordam beramiz deyishdi. O‘rganishni boshlashdi. Ammo to‘rt–besh kun o‘tgach, jim bo‘lib ketishdi. Hech kim e’tibor bermayapti. Uyim shu holatda qolib ketishidan qo‘rqyapman. Shuning uchun ham tuman hokimidan umid qilib borgandim.
Ma’lum bo‘lishicha, Sofiya Zikrillayeva hududdagi 12-sonli umumta’lim maktabida boshlang‘ich sinflarga dars berib keladi. Uyda yolg‘iz yashaydi.
“Yakkadaraxt” MFY raisi Jonimqul Kenjayevning ma’lumot berishicha, Sofiya Zikrillayevaga tuman hokimi o‘z oyligidan 500 ming so‘m yordam bergan. Sug‘urta kompaniyasi esa 4 million 200 ming so‘m to‘lab berishini ma’lum qilgan. Rais buva shuningdek, mahalla ahli ham bu vaziyatda jim qarab turmasligini, pul yig‘ib yordam berajagini ma’lum qildi. Ammo qachonligi noma’lum.
Izoh (0)