Frenk Lempard uchun navbatdagi jiddiy sinov. “Liverpul”—“Chelsi” to‘qnashuvi haqida

Bugun, 14-avgust sanasida ko‘hna va muhtasham Istanbul futbol bo‘yicha UEFA Superkubogi bellashuviga mezbonlik qiladi. Unda Angliyaning ikki jamoasi — “Liverpul” hamda “Chelsi” o‘zaro kurash olib boradi. Yurgen Klopp jamoasi ushbu o‘yinga Yevropa Chempionlar Ligasi musobaqasi g‘olibi sifatida yetib kelgan bo‘lsa, Mauritsio Sarridan ingliz futboli afsonalaridan biri Frenk Lempard qo‘l ostiga o‘tgan “Chelsi” esa Yevropa Ligasining bosh sovrini sohibi sifatida tashrif buyuradi. Biz esa Superkubok atrofida yuz bergan va berayotgan voqeliklarga to‘xtalib o‘tishni lozim topdik.

Yevropa Superkubogi

Istanbul mezbonlik qiladigan navbatdagi Superkubok bahsi hisob bo‘yicha 44 marta o‘tkazilmoqda. Ya’ni shuncha mavsumdan beri Chempionlar hamda Yevropa Ligasi g‘oliblari Superkubok uchun maydonga tushib kelmoqda. 2016-yil dekabrida UEFA ilk bor o‘z tasnifidagi musobaqalar mezbonini aniqlash uchun ochiq tender e’lon qildi. Musobaqa mezbonligini o‘zida qabul qilishga qiziqish bildirgan assotsiatsiyalar 2017-yil 6-iyuniga qadar ariza topshirishi kerak edi. 7-iyunda esa Albaniya (“Milliy stadion”), Fransiya (“Tuluza” stadioni), Isroil (“Sammi Ofer”), Qozog‘iston (“Ostona” arenasi), Shimoliy Irlandiya (“Uindzor Park”), Polsha (“PGE Arena”), Turkiya (“Vodafon Park”) mezbonlik ariza topshirgani ma’lum bo‘ldi.

2017-yil 20-sentabrida esa UEFA Turkiyadagi “Vodafon Park”ni Yevropa Superkubogining mezboni sifatida e’lon qildi. Bu Turkiya mezbonlik qilayotgan ilk Yevropa Superkubok bahsi hisoblanadi. Shuningdek, 2005-yilgi Chempionlar Ligasi hamda 2009-yilgi “Otaturk” stadioni mezbonlik qilgan UEFA tasnifidagi musobaqalardan so‘ng uchinchisidir.

“Beshiktosh” egalik qiladigan “Vodafon Park” 2016-yil 10-aprelida ochilgan. Arena o‘z bag‘riga 41 903 tomoshabinni sig‘dira oladi.

“Liverpul”

Yurgen Klopp shogirdlari mavsumni qaysidir ma’noda yaxshi va yana qaysidir ma’noda yomon boshladi. Xo‘sh, avval yaxshisi haqida gapiradigan bo‘lsak, jamoa o‘yini avvalgi mavsumdagi darajadan tushmagan. Angliya Superkubogi uchun bahsda “qizillar” “Manchester Siti”dan qolishmagan holda o‘yin namoyish etdi. Shuningdek, Angliya Premyer ligasi yangi mavsumini yirik hisobdagi g‘alaba bilan boshladi. Yomoni esa tushunganingizdek, chempionatda bo‘lgani singari yana bir sovrinni “Manchester Siti”ga boy berdi. “Liverpul” bugungi uchrashuv oldidan kadrlar bo‘yicha qator muammolarga ega. Eng katta yo‘qotish, shubhasiz, braziliyalik Alissonning jarohati. Alisson Premyer liga 1-turidan o‘rin olgan “Norvich”ga qarshi o‘yinda jarohat olib, kamida 6 haftaga safdan chiqdi. Mersisaydliklar uning o‘rnini esa Adrian bilan bildirmaslikka harakat qiladi. Biroq unda katta o‘yinlar tajribasi kamligini ham hisobga olish lozim. Shunga qaramay “Vest Hem” sobiq posbonida “Chelsi”ga qarshi o‘ynash tajribasi yetarlicha. Bundan tashqari jarohat sabab Deyan Lovren, Nataniel Klayn hamda Nabi Keytalar Superkubok bahsida “Liverpul”ga yordam bera olmaydi.

Qayd etish joiz, ingliz klublari ichida “Liverpul” hozircha Yevropa Superkubogining so‘nggi g‘olibi bo‘lib turibdi. Mersisayd klubi 2005-yil Moskvaning SSKAsini mag‘lub etib, kubok sohibi bo‘lgandi.

“Chelsi”

Yangi bosh murabbiy Frenk Lempard qo‘l ostiga o‘tgan “Chelsi” uchun bu mavsum oson o‘tmasligi avvaldanoq taxmin qilingandi. Ne baxtki, taxminlar ham Angliya Premyer ligasining 1-turidanoq oqlandi. “Chelsi” safarda “Manchester Yunayted”ga 0:4 hisobida yutqazdi. “Aristokratlar” musobaqa tarixida “Yunayted”ga bunchalik yirik hisobda yutqazmagan edi. Shuning o‘ziyoq Lempard oldida juda qiyin yo‘l kutib turganini ko‘rsatib berdi. To‘g‘ri, London klubi eng asosiy yulduzi Eden Azar, jamoa himoyasi tayanchlaridan biri David Luisdan ajraldi. Ammo Frenk endi jamoani ularsiz o‘ynashga o‘rgatishi lozim. Shuning uchun ham Lempard jamoaga olib kelingan, nazarimizda. “Liverpul”ga qarshi o‘yin esa nafaqat Lempard, balki butun “Chelsi” uchun ham katta sinov vazifasini o‘taydi. Bu sinovdan o‘tish orqali esa jamoa o‘z o‘yinini bir muncha tartibga keltirib, “rels”ga tushib olishga ko‘mak beradi. Jarohatlar haqida gap ketadigan bo‘lsa, Kallum Hadson-Odoi hamda Ruben Loftus-Chik o‘yinni o‘tkazib yuborishi aniq. Jarohatdan to‘liq tiklanib ulgurgmagan, ammo o‘yin qaydnomasidan o‘rin olgan Antonio Ryudiger hamda Villian esa bahsni zaxira o‘rindig‘idan boshlashi kutilmoqda. Bundan tashqari eng katta yo‘qotishlardan biri Ngolo Kantening ham maydonga tushishi hamon so‘roq ostida.

O‘yindan oldingi fikrlar

UEFA Superkubogi — bu sifat belgisi. Agar sen unda ishtirok etmayotgan bo‘lsang, demak sen o‘z finalingni yutmagansan. Men avval Chempionlar Ligasi va Yevropa Ligasi finallarida mag‘lub bo‘lganman. Bu safar esa boshqacha. Men bu o‘yinni intizorlik bilan kutmoqdaman. Bu top darajadagi o‘yin bo‘ladi.Yurgen Klopp, “Liverpul” bosh murabbiyi

Bu — men uchun murabbiy sifatidagi yevroarenadagi ilk o‘yinim bo‘ladi. Har bir o‘yinchi bu uchrashuv ikkala klub uchun ham qanday ahamiyat kasb etishini tushunishi lozim. Futbolchilar maydonda bor kuchini berishi kerak bo‘ladi. Bizni oldinda jiddiy sinov kutmoqda.

Frenk Lempard, “Chelsi” bosh murabbiyi