Toshkent markaziy hamda Toshkent janubiy temir yo‘l vokzallari chiptaxonalariga elektron navbat, monitorlar, elektron tablolar o‘rnatildi. Bu haqda “O‘ztemiryo‘lyo‘lovchi” matbuot xizmati xabar berdi.

Foto: “O‘ztemiryo‘lyo‘lovchi” matbuot xizmati

Endilikda, har ikkala vokzalga kelgan yo‘lovchi elektron navbat oladi hamda o‘rindiqlarda o‘tirib, zalga o‘rnatilgan monitorlarni kuzatib turadi. Navbat hamda kassa raqami monitorda ko‘rinishi bilan chipta xarid qilish uchun o‘sha kassaga borib murojaat qilishi mumkin.

Foto: “O‘ztemiryo‘lyo‘lovchi” matbuot xizmati

Chiptaxona zaliga o‘rnatilgan elektron tablodan esa yo‘lovchilar “O‘zbekiston temir yo‘llari” saytiga kirib poyezdlar harakat jadvali va boshqa ma’lumotlarni olishi mumkin.

Foto: “O‘ztemiryo‘lyo‘lovchi” matbuot xizmati

Shuningdek, Toshkent markaziy temiryo‘l vokzali chiptaxona zalida o‘rnatilgan katta ekranda qaysi poyezdga va qaysi vagonda chipta bor yo‘qligi ko‘rinib turadi.

Qayd etilishicha, elektron uskunalar sinov tariqasida ishlatilmoqda. Kelajakda bunday qulayliklar respublikaning boshqa hududlaridagi temir yo‘l vokzallarida ham joriy qilinishi ko‘zda tutilgan.

Foto: “O‘ztemiryo‘lyo‘lovchi” matbuot xizmati

Bu kassalar oldida uzundan uzun navbatga turish va turli xil tushunmovchiliklarning oldini olish imkonini beradi.