“O‘zbekneftgaz” va Gas Project Development Central Asia kompaniyalari tomonidan tashkil etilgan Natural Gas-Stream qo‘shma korxonasi O‘zbekiston shimoli-sharqida gaz qazib olishga 700 million dollardan ziyod miqdorda sarmoya kiritadi. Bu haqda Vazirlar Mahkamasi tegishli qaror qabul qilindi, deb xabar beradi “Gazeta.uz”.
Loyihada Sechanko‘l, Oqjar va Chimboy investitsiya bloklarida geologiya-qidiruv ishlarini olib borish hamda Urga, Oqchaloq va Chandir guruhi konlarini o‘zlashtirish ko‘zda tutilgan.
Loyihaning texnik-iqtisodiy asoslariga ko‘ra, kiritilayotgan sarmoya hajmi 701,4 million dollarni tashkil etib, uning 243,4 million dollari QK shaxsiy mablag‘lari, 458 million dollari esa chet el investitsiyalaridan iborat.
Qazib olish bo‘yicha loyihaviy quvvati 1,633 milliard kub metr tabiiy gaz, 94,5 ming tonna gaz kondensati, 80 ming tonnaga yaqin yonilg‘ini (benzin, kerosin, suyultirilgan gaz) tashkil etadi. Qazib olinayotgan barcha gaz eksport qilinadi.
Natural Gas-Stream QK 2016-yilda Ustyurt hududida geologik razvedka ishlarini o‘tkazish va gaz qonlarini o‘zlashtirish uchun tashkil etilgan. O‘zbekiston tomonidan “O‘zbekneftgaz”dan tashqari, “Muborakneftgaz” va “Ustyurtgaz”, xorijdan esa “Gazprom” tuzilmalaridan tashqari, Kiprda ro‘yxatga olingan Altmax Holding kompaniyasi ta’sischi hisoblanadi. Kompaniyalar ulushi to‘g‘risida ma’lumot berilmadi.
Izoh (0)