Davlat maktablarining o‘quvchilariga forma ishlab chiqaruvchi korxonalar o‘zi joylashgan hududdagi o‘quvchilarga xizmat ko‘rsatadi. Bu haqda “O‘zto‘qimachiliksanoat” uyushmasi ma’lum qildi.
“Uyushmaga a’zo bo‘lishidan qat’iy nazar, maktab formasini tikishga imkoniyati yetarli bo‘lgan korxonalarga metodik yordam beramiz. Shuningdek, korxonalarda mato yetishmovchiligi bo‘lsa, kamchiliklarni bartaraf etishga ko‘maklashamiz. Maktab formasini tikish bo‘yicha Qoraqalpog‘iston Respublikasi, Xorazm, Namangan, Farg‘ona va Andijon viloyatining barcha tuman, shaharlarida ishlar boshlab yuborilgan. O‘ylaymanki, 1-sentabrgacha barcha maktab o‘quvchilari forma bilan to‘liq ta’minlanadi”, — dedi uyushma raisi Ilhom Haydarov.
Uning qo‘shimcha qilishicha, maktab formasi uchun ayrim joylarda import matolardan ishlatilishi mumkin. Foydalanilayotgan barcha materiallar standartlarga to‘la-to‘kis javob beradi.
Davlat maktablarining o‘quvchilarini yagona maktab formasi bilan ta’minlashga oid hukumat qarori 2018-yil 15-avgustda qabul qilingan. Unga ko‘ra, “O‘zto‘qimachiliksanoat” uyushmasi maktab formasini ishlab chiqaruvchi tashkilotlar ro‘yxatini hududlar bo‘yicha shakllantirishi hamda aholiga qulay joylarida maktab formasi savdo shoxobchalarini tashkil etishi belgilangan.
Avvalroq Xalq ta’limi vazirligi boshqarma boshlig‘i Akbar Tog‘ayev umumiy o‘rta ta’lim muassasalari o‘quvchilarining yagona maktab formasi 2019/2020-o‘quv yilidan majburiy bo‘lishini aytib o‘tgandi.
Izoh (0)