“Chelsi” Yevropa Ligasi rekordini takrorladi

18-aprel, payshanba kuni futbol bo‘yicha Yevropa Ligasi chorak finalining javob o‘yinida “Chelsi” o‘z maydonida “Slaviya”ni 4:3 hisobida mag‘lub etdi (dastlabki uchrashuv — 1:0).

Natijada londonliklar mazkur musobaqadagi mag‘lubiyatsiz seriyasini 15 ta uchrashuvga yetkazib oldi (14 ta g‘alaba, 1 ta durang). Gracenote Live’ning xabar berishicha, klub bu borada “Atletiko”ning 2011-yilning noyabr oyidan 2012-yil oktabr oyiga qadar o‘rnatgan rekordini takrorladi.

So‘nggi bor “Chelsi” 2013-yilning aprel oyida bo‘lib o‘tgan Yevropa Ligasi 1/4 finalining javob o‘yinida “Rubin”ga mag‘lub bo‘lgandi (2:3). O‘sha yilgi mavsumda “ko‘klar” finalda “Benfika” ustidan 2:1 hisobida g‘alaba qozonib, musobaqa chempioniga aylangandi.