Jinoyat ishlari bo‘yicha Toshkent shahar sudi apellyatsiya shikoyatini ko‘rib chiqib, shifokor Nodir To‘laganovni Olmazor tumanida uch opa-singilning o‘limi haqidagi ish bo‘yicha aybsiz deb topdi. Bu haqda Jinoyat ishlari bo‘yicha Toshkent shahar sudi “Daryo”ga ma’lum qildi.
O‘tgan yilning oktabrida Respublika ixtisoslashtirilgan ilmiy-amaliy pediatriya tibbiyot markazi shifokori 34 yoshli Nodir To‘laganov Jinoyat kodeksining 116-moddasi (kasb yuzasidan o‘z vazifalarini lozim darajada bajarmaslik) bo‘yicha aybdor deb topilib, 6 yilga ozodlikdan mahrum qilingan edi.
Ammo himoya tomoni sudga shifokor yo‘riqnoma bo‘yicha ish tutib, qonunni buzmaganini isbotladi. Jonlantirish bo‘limida opa-singillarning eng kichigi vafot etgach, shifokor qandaydir yuqumli kasallik tashxisini qo‘yib, bolalarni tegishli tibbiy muassasaga yuborishga qaror qiladi. Shifokor bunday qarorni ichki yo‘riqnomaga muvofiq qabul qilganini tushuntirdi: u yuqumli kasallikka chalingan bolalarni rejali operatsiyalar bilan shug‘ullanadigan klinikada qoldira olmas edi. Agar bu zaharlanish emas, xavfli infeksiya bo‘lib chiqsa, markazdagi o‘nlab bemorlarga yuqishi mumkin edi.
Shuningdek, qizlarning ota-onasi avvalgi ko‘rsatmalarni ular prokuratura tergovchilari bosimi ostida berganini aytib, shifokor To‘laganovga nisbatan da’volari yo‘qligini ma’lum qilgan.
Nodir To‘laganov avvalgi lavozimiga tiklanish huquqi bilan to‘liq oqlandi.
Eslatib o‘tamiz, 2010-yilda tug‘ilgan Munisa, 2011-yilda tug‘ilgan Muxlisa va 2013-yilda tug‘ilgan Mohira Qosimovalar 2017-yil 8-noyabr kuni tibbiyot muassasalarida vafot etgan edi. Mazkur holat yuzasidan 9-noyabr kuni Olmazor tuman prokuraturasi tomonidan Jinoyat kodeksining 186-moddasi 4-qismi “a” bandi bilan jinoyat ishi qo‘zg‘atilgan.
Izoh (0)