Toshkentda sog‘liqni saqlash sohasida birinchi xalqaro investitsiyaviy forumi bo‘lib o‘tmoqda. Bu haqda “Daryo”ga Sog‘liqni saqlash vazirligi matbuot xizmati ma’lum qildi.
Sog‘liqni saqlash va farmatsevtika sanoatida xalqaro hamkorlikni yanada kengaytirish, to‘g‘ridan-to‘g‘ri investitsiyalarni jalb etish, tibbiyot sohasi investitsion jozibadorligini oshirish va xalqaro standartlarni joriy etishga qaratilgan forumda Rossiya, Xitoy, Fransiya, Gretsiya, Hindiston, Belarus, Eron, Birlashgan Arab Amirliklari, Malayziya, Qozog‘iston, Tojikiston va Ozarbayjon singari o‘ndan ziyod mamlakat hamda O‘zbekiston kompaniyalari vakillari ishtirok etmoqda.
Forumda qayd etilganidek, bugungi kunda sog‘liqni saqlash sohasida investitsiyalarni jalb etishga alohida e’tibor qaratilib, umumiy qiymati 600 million dollardan ziyod 17 ta istiqbolli sarmoyaviy loyiha ishlab chiqilmoqda. Loyiha tashabbuskorlari bilan birgalikda jami 23 million dollarga teng to‘rtta investitsiya loyihasini amalga oshirish boshlandi. Ayni paytda xorijiy sarmoyadorlar ishtirokida nafaqat poytaxt, balki mamlakatning barcha hududlarida 50 ga yaqin yirik xususiy tibbiyot muassasalari tashkil etilib, samarali faoliyat yuritmoqda.
2018-yilda sog‘liqni saqlash sohasidagi xalqaro moliya institutlari ko‘magida oltita loyihani amalga oshirishga 24 million dollar sarflangan bo‘lsa, 2019-yilda bu ko‘rsatkich bir necha baravarga oshib, yil oxirigacha 110 million dollar qiymatidagi 8 ta loyihani amalga oshirish ko‘zda tutilgan.
Farmatsevtika sanoatiga investitsiyalarni yo‘naltirishga ham alohida ahamiyat berilmoqda. O‘tgan yilda farmatsevtika sanoatida 96 million dollarga teng 34 ta investitsiyaviy loyiha, jumladan, 7 ta erkin iqtisodiy zonada 61 million dollar qiymatidagi 8 ta loyiha amalga oshirildi. Bundan tashqari, ushbu zonalarda 169 million dollarga teng 30 loyihani amalga oshirish ishlari olib borilmoqda. Joriy yilda jami 485 million dollarga teng investitsiya loyihalari amalga oshirish rejalashtirilmoqda.
Tadbir ishtirokchilari tomonidan O‘zbekistonda sog‘liqni saqlash tizimini rivojlantirish istiqbollari, sog‘liqni saqlash va farmatsevtika sanoatining sarmoyaviy salohiyati, davlat-xususiy sektor hamkorligi asosida sanoat rivojlantirish va O‘zbekistonda tibbiy turizmni yo‘lga qo‘yish masalalari ham muhokama qilindi.
Forum doirasida B2B hamkorlik kooperatsiyasi birjasi ham bo‘lib o‘tadi.
Shuningdek, Sog‘liqni saqlash vazirligi tomonidan “O‘zekspomarkaz”da “Sog‘liqni saqlash —2019” 24-xalqaro sog‘liqni saqlash ko‘rgazmasi tashkil etilib, unda 22 mamlakatdan 250 ta kompaniya va mahalliy ishlab chiqaruvchi tibbiy jihozlar, laboratoriyalar, farmatsevtik va stomatologik asbob-uskunalar, dori-darmon mahsulotlari bilan ishtirok etmoqda.
Ko‘rgazma doirasida Sog‘liqni saqlash vazirligining “O‘zbekistonda tibbiy turizm salohiyati” mavzusida taqdimoti ham o‘tkaziladi.
Forumning ochilish marosimida Bosh vazir o‘rinbosari Aziz Abduhakimov, Sog‘liqni saqlash vaziri Alisher Shodmonov, Investitsiyalar va tashqi savdo vaziri Sardor Umurzoqov ishtirok etdi va so‘zga chiqdi.
Izoh (0)