Quva tumani Akbarobod qishlog‘ida istiqomat qiluvchi fuqaro Odina Jumayeva uch egizak farzandini boqishda qiyinchiliklarga duch kelgan edi. Bu haqda Sog‘liqni saqlash vazirligi jamoatchilik bilan aloqalar bo‘limi “Daryo”ga xabar berdi.
Ma’lum bo‘lishicha, Odina Jumayevaning asosiy muammosi farzandlariga sun’iy sut mahsulotlarini yetkazib berishdagi qiyinchiliklar bo‘lgan. Uch egizak farzandlarning tibbiy nazorati esa 80-sonli qishloq oilaviy poliklinikasi mudiri Ilhom Umaraliyev hamda patronaj hamshirasi Mahliyo Yangiboyeva tomonidan muntazam olib borilmoqda. Darhaqiqat, ona va bola salomatligi davlatning doimiy e’tiborida bo‘lib, Sog‘liqni saqlash vazirligi tomonidan har bir tug‘ilgan bolaning sog‘lom voyaga yetishi muntazam nazorat qilib boriladi.
Yaqinda Quva tuman tibbiyot birlashmasi boshlig‘i A.Sotvoldiyev, birlashma boshlig‘ining o‘rinbosari D.Ibragimova hamda qishloq oilaviy poliklinikasi mudiri I.Umaraliyev Odina Jumayeva xonadoniga tashrif buyurib, chaqaloqlarning umumiy holatini yana bir bor tibbiy ko‘rikdan o‘tkazgan. Bundan tashqari, egizaklarni chuqurlashtirilgan tibbiy ko‘rikdan o‘tkazish uchun viloyat bolalar ko‘p tarmoqli tibbiyot markaziga olib borish uchun yo‘llanma berilgan.
Shunga ko‘ra, shu yilning 1-aprel kuni Odina Jumayeva egizak farzandlari bilan tuman tibbiyot birlashmasi tomonidan ajratilgan tez tibbiy yordam mashinasida viloyat bolalar ko‘p tarmoqli tibbiyot markaziga olib kelingan. Markazda bosh shifokor Sh.Qo‘chqorov boshchiligida pediatr, kardiolog, nevrolog, nefrolog, kardioxirurg, ortoped, reanimatolog hamda UTT shifokorlari tomonidan egizaklar chuqurlashtirilgan tibbiy ko‘rikdan o‘tkazilgan.
Tekshiruv natijalariga ko‘ra, egizaklarning kattasi Iqboljon va kenjasi Imronjonlarning ahvoli qoniqarli. O‘rtanchasi Islomjonda esa kardiologik xastalik mavjudligi aniqlanib, kerakli tibbiy muolajalar o‘tkazilgan. Ayni paytda uning sog‘lig‘i yaxshilanib bormoqda.
Egizaklar ayni paytda umumiy amaliyot shifokori, kardiolog hamda patronaj hamshirasi tomonidan doimiy nazoratga olingan.
Izoh (0)