Venesuela hukumati 18-mart kuni muxolifat vakillari tomonidan Qo‘shma Shtatlardagi diplomatik vakolatxonalari egallab olinganini ma’lum qilgan, deya xabar beradi “Kommersant”.
Karakas Vashingtondan ushbu binolarning ishg‘ol qilinishini to‘xtatish uchun choralar qabul qilish bo‘yicha qonuniy majburiyatlarni bajarishini talab qilmoqda. Aks holda Venesuela “Venesuela hududida ham javoban xuddi shunday harakatlar” qilish huquqini o‘zida qoldiradi.
Eslatib o‘tamiz, yanvar oyi oxirida Venesuela Milliy Assambleyasi raisi Xuan Guaydo o‘zini prezident vazifasini bajaruvchi deb e’lon qilgan. U Amerika Qo‘shma Shtatlari, bir nechta Lotin Amerikasi davlatlari va ko‘plab Yevropa davlatlari tomonidan qo‘llab-quvvatlangan. Rossiya, Xitoy, Turkiya va Kuba Nikolas Maduroni qonuniy prezident deb biladi.