Joriy yilning 14-mart kuni Sirdaryo viloyat prokuraturasi tomonidan Yo‘l harakat xavfsizligi boshqarmasi xodimlari o‘rtasida korrupsiyaga qarshi kurashish va yo‘l transport hodisalarini oldini olish borasidagi faoliyatida yo‘l qo‘yilgan kamchiliklar muhokama qilindi. Bu haqda Sirdaryo viloyat IIB YXHB matbuot xizmati xabar berdi.
Uchrashuvda bevosita prezident tashabbusi bilan ichki ishlar organlari xodimlarini ish va yashash sharoitlarini yaxshilashga, shuningdek ularni xalq manfaatlariga ishonchli xizmat qiluvchi professional tuzilmaga aylantirish borasida bir qator islohotlar amalga oshirib borilayotganligi ta’kidlab o‘tildi.
Viloyat hududida yo‘l-transport hodisalarining oldini olish borasida 2 ta onlayn rejimdagi, 3 ta ko‘chmas avtomatik ravishda tezlikni qayd etuvchi, 14 ta mulyaj fotoradar moslamalari hamda piyodalar o‘tish yo‘laklarida haydovchilarning diqqatini jalb etuvchi bannerlar, yo‘llarni yoritish uchun eski turdagi spiralli lampochkalar o‘rniga 2697 ta yangi turdagi “Led” rusumli yoritish chiroqlari o‘rnatilgan.
Muloqot davomida bugungi kunda sohada ijobiy o‘zgarishlar izchil amalga oshirib borilayotgan bir vaqtda, yo‘l harakati xavfsizligi boshqarmasida qonunbuzilish holatlari hamda xodimlar o‘rtasida nojo‘ya xatti-harakatlar sodir etish holatlari mavjudligi aytib o‘tildi.
Viloyat Yo‘l harakati xavfsizligi boshqarmasi xodimlari tomonidan sodir etilgan nojo‘ya xatti-harakatlar va qonunbuzilishlar bo‘yicha 377 marotaba xizmat tekshiruvlari o‘tkazilib, natijasiga ko‘ra 53 nafar xodimlar intizomiy jazoga tortilgan, 21 nafari lavozimidan ozod etilib, 2 nafari ichki ishlar organlaridan bo‘shatilgan.
Yo‘l harakati xavfsizligi boshqarmasi xodimlari orasida hamon korrupsion jinoyatlar davom etib kelayotganligi, fuqarolarga nisbatan asossiz va noqonuniy ma’muriy bayonnomalar tuzish holatlariga barham berilmayotganligi aytildi.
Viloyat prokuraturasi tomonidan ma’muriy qarorlarni qonuniyligi yuzasidan o‘tkazilgan tekshirishda 87 ta noqonuniy qarorlarga protest keltirilib, bekor qilindi, 55 nafar fuqarolarni buzilgan huquqlari tiklandi.
Sodir etilgan yo‘l-transport hodisalari yuzasidan tegishli chora-tadbirlar yetarli darajada amalga oshirilmaganligi oqibatida o‘tgan yilda viloyat hududida sodir bo‘lgan yo‘l-transport hodisalarida 65 nafar, joriy yilda 9 nafar fuqarolar vafot etgan.
Ayniqsa, joriy yilning 3-mart kuni Nexia rusumli avtomashinasi Xovos tumani hududidan o‘tuvchi magistral yo‘lida Nexia 3 rusumli avtomashinasining old qismiga urilib yo‘l-transport hodisasi sodir bo‘lishi oqibatida uch kishi vafot etgan.
Bu avvalo, yo‘l harakati xavfsizligi boshqarmasi tomonidan yo‘l transport hodisalarini oldini olish borasida amalga oshirilayotgan ishlarning yetarli samara bermayotganligidan dalolat beradi, deyiladi xabarda.
Izoh (0)