Samarqandda hokimlikning zaxira yerlari tasarrufidagi yer maydonlarini sotib yuborgan fermer jazolandi
Jinoyat ishlari bo‘yicha Samarqand tuman sudida tuman hokimligining zaxira yerlari tasarrufida bo‘lgan yer maydonlarini fuqarolarga uy-joy qurish uchun sotib yuborgan fermerning ishi ko‘rib chiqildi. Bu haqda Samarqand tuman sudi “Daryo”ga ma’lum qildi.
“Xoliq-Agro” fermer xo‘jaligi raisi Alisher Azimov 2018-yilning mart oyida fuqaro M.Ahmedovni aldab, bir sotix yerni 1000 dollarga sotishini ma’lum qilgan. Ahmedovni o‘zining so‘zlariga ishontirgan Azimov 6 sotix yer uchastkasi uchun 6000 dollar miqdoridagi pullarni firibgarlik yo‘li bilan qo‘lga kiritgan.
Bundan tashqari, Alisher Azimov o‘zining jinoiy harakatlarini davom ettirib, 2018-yilning oktabr oyida fuqaro M.Fozilovani aldab, uning ishonchiga kirib, tuman hokimligining zaxira yerlari tasarrufida bo‘lgan yer maydonidan 10 sotix yer uchastkasini berish evaziga 9500 dollar miqdoridagi pullarni firibgarlik yo‘li bilan qo‘lga kiritgan.
Alisher Azimovning kirdikorlari uning fermer xo‘jaligiga 2018-yilning 4-dekabr kuni Samarqand tuman hokimi kelganidan so‘ng aniq bo‘lgan. Azimovdan fermer xo‘jaligining yerlarini fuqarolarga uy-joy sifatida ajratib berish sabablari so‘ralganda, u ushbu uy-joylarni ajratib bermaganligini ma’lum qilgan. Fuqaro Ahmedov va Fozilovaning noqonuniy qurilgan qurilishlarini buzish ishlari boshlanganidan so‘ng ular tuman IIBga kelib, “Xoliq-Agro” fermer xo‘jaligi yerlaridan yer ajratib berish evaziga Azimov pul talab qilganligi yuzasidan murojaat qilgan. Aynan ushbu murojaatdan so‘ng Alisher Azimov yerlarni noqonuniy tarzda sotganligi aniqlandi.
Jinoyat ishlari bo‘yicha Samarqand tuman sudining “Pulimug‘ob” mahalla fuqarolar yig‘inida bo‘lib o‘tgan sayyor sud majlisida tomonlarning taqdim etgan tushuntirish xatlari, yuzlashtirish bayonnomasi, ashyoviy dalil hamda ish bo‘yicha to‘plangan boshqa dalillar yig‘indisi bilan Alisher Azimovning aybi to‘liq isbotlandi. Sud majlisida sudlanuvchi o‘z aybiga to‘liq iqrorlik bildirib suddan yengillik berishni so‘radi.
Sudya D.Nuraliyev raisligida o‘tgan sud majlisida Alisher Azimov O‘zbekiston Jinoyat Kodeksining 168-moddasi 3-qismi “a, b” bandlari (ko‘p miqdorda; takroran yoki xavfli retsidivist tomonidan sodir etilgan firibgarlik) bilan aybli deb topildi. Unga har oylik ish haqining 20 foizini davlat daromadi hisobiga ushlab qolgan holda, 3 yil axloq tuzatish ishlari jazosi tayinlandi. Shuningdek, Samarqand viloyat IIB depozitida saqlanayotgan jami 124 980 760 so‘m pullardan 79 656 930 so‘m miqdoridagi pullar jabrlanuvchi M.Fozilovaga, 45 323 830 so‘m miqdoridagi pullar M.Ahmedovga topshirilishi belgilandi.
