Surxondaryoda fuqaro J.F. O‘zbekistonga xorijiy avtotransport vositasi hisoblangan Lacetti avtomobilini olib kirar ekan, bu jarayonda mashinani mamlakat hududidan qayta olib chiqib ketish majburiyatini zimmasiga oladi. Biroq bu majburiyatni bir zumda unutib, avtomashinani ehtiyot qismlarga bo‘laklagan holda 1700 AQSh dollariga sotib yuboradi. Bu haqda Bojxona qo‘mitasi axborot xizmati xabar berdi.
Avtomobilni olib chiqish muddatlari yaqinlashganda esa suvdan quruq chiqish maqsadida bojxonachilarning ko‘zini shamg‘alat qilishga urinadi. Ya’ni, bundan bir necha yillar muqaddam yonib ketgan boshqa bir Lacetti kuzovini ko‘rsatgan holda davlat bojxona xizmati organlari xodimlarini ushbu mashinaning go‘yoki yong‘in oqibatida butunlay yonib ketganiga ishontirishga urinadi.
Sinchkovlik bilan o‘tkazilgan tekshirishda uning sodir etgan huquqbuzarligi fosh bo‘lgach, ushbu shaxs vaziyatdan chiqishning boshqa yo‘llarini izlashga tushadi. Ya’ni, ushbu holatni “bosdi-bosdi” qilish uchun bojxona xodimiga 400 AQSh dollari pora taklif qiladi.
Mazkur holat yuzasidan o‘tkazilgan tezkor tadbir davomida ushbu shaxs bojxona xodimiga taklif qilingan poraning 300 dollarini berayotgan vaqtida Surxondaryo viloyati bojxona boshqarmasi tezkor xodimlari hamda Bosh prokuratura huzuridagi departament viloyat boshqarmasi xodimlari bilan hamkorlikda voqea joyida ashyoviy dalillar bilan qo‘lga olindi.
Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Izoh (0)