Jerrardning “Reynjers”i bitta o‘yinda 4 ta penalti ishladi, Stivning fikricha esa ular 5 ta tepishi kerak edi
Futbol bo‘yicha Shotlandiya chempionatining 24-turida “Reynjers” klubi “Sent-Mirren”ni 4:0 hisobida mag‘lub etdi.
Mazkur uchrashuvda glazgolik futbolchilar hakam Endryu Dallasning qarori bilan 4 marta 11 metrlik jarima zarbasidan to‘p tepdi.
Bellashuvning 3 va 55-daqiqalarida himoyachi Jeyms Tavernyer darvozani aniq nishonga oldi, ammo yana bitta urinishdan unumli foydalana olmadi. 80-daqiqada esa hujumchi Jermeyn Defo penaltidan gol urdi.
“Biz 5 ta penalti tepishimiz kerak. Bu juda g‘alati. Hakamlar Morelosga qarshi ishlatilgan qo‘pollikni payqashmadi. Ba’zan penalti belgilashadi, ba’zida esa yo‘q”, — deydi “Reynjers” bosh murabbiyi Stiven Jerrard BBC’ga bergan intervyusida.
“Reynjers” 48 ochko to‘plagan holda musobaqa jadvalida “Seltik”dan so‘ng 2-o‘rinda bormoqda.
Ma’lumot uchun, “Seltik”da 51 ochko mavjud va zaxirasida bitta o‘yin bor.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
