Toshkentda 2018-yil 17-dekabrda “O‘zatom” agentligi va “Rosatom” davlat korporatsiyasi ishchi guruhlarining dastlabki kengashi bo‘lib o‘tdi, deb xabar berdi “O‘zatom” agentligi matbuot xizmati.
O‘zbekistonga tashrif buyurgan Rossiya delegatsiyasiga “Rosatom” davlat korporatsiyasi bosh direktorining operatsion boshqaruv bo‘yicha birinchi o‘rinbosari - “IK” AES AJ prezidenti Aleksandr Lokshin boshchilik qildi.
Yig‘ilish davomida O‘zbekiston tomonidan O‘zbekistonda birinchi atom elektr stansiyasini qurish uchun maydon tanlash maqsadida muhandislik tadqiqotlariga oid ishlar holati to‘g‘risida ma’lumot berildi. Shuningdek, “O‘zatom” agentligi tomonidan muhandislik tadqiqotlari dasturi tasdiqlandi.
Muzokaralar davomida O‘zbekiston tomoniga ushbu loyihaga asosan dastlabki shartnomalarning loyihalari berildi. “Rosatom” davlat korporatsiyasi ham O‘zbekiston Respublikasida birinchi AES qurilishi loyihasi bo‘yicha kontraktatsiyaga yondashuvlar to‘g‘risidagi materiallarni va muzokaralarning maqsadli rejasini taqdim qildi. Tomonlar shartnomalarga oid muzokaralarni 2019-yilda boshlashni mo‘ljallamoqda.
Eslatib o‘tamiz, 2018-yilning 7-sentabrida O‘zbekiston Respublikasi Bosh vaziri Abdulla Oripov va Rossiya Bosh vaziri Dmitriy Medvedev O‘zbekistonda Rossiya texnologiyalari asosida atom elektr stansiyasini qurish bo‘yicha ikki mamlakat hamkorligi to‘g‘risidagi hukumatlararo bitimni imzoladi. Loyihaga ko‘ra, SSER-1200 reaktorli ikkita energoblok qurilishi rejalashtirilgan.
Izoh (0)