Janubiy Koreyaning Samsung texnologik konserni ishlab chiqarish jarayonining zarari tufayli kasallikka chalingan hamda ushbu kasalliklar tufayli vafot etgan yuzlab xodimlarning oila a’zolaridan kechirim so‘radi, deb xabar berdi “Korrespondent.net”.
23-noyabr, juma kuni konsern rahbari Ki Nam Kim Janubiy Koreyadagi telekanal jonli efirida chiplar va suyuq kristalli displeylar ishlab chiqarish jarayonidagi salomatlikka xavf tug‘dirishi mumkin bo‘lgan holatlarga qarshi yetarlicha choralar ko‘rilmaganidan afsusda ekanligini ma’lum qilgan.
“Biz turli kasalliklardan aziyat chekayotgan xodimlar, shuningdek ularning oila a’zolaridam kechirim so‘raymiz”, — deydi u.
Bundan tashqari, konsern ish joyida zararli kimyoviy moddalar bilan ishlagani oqibatida kasallikka chalingan sobiq va hozirgi xodimlarga tovon puli to‘lashga rozi bo‘ldi.
Kelgusi o‘n yilda ularga 150 million vongacha (116 ming yevro atrofida) tovon puli to‘lanadi.
Samsung kompaniyasi rahbariyati va xodimlari o‘rtasidagi kelishmovchilik 2007-yilda 23 yoshli qizning leykemiyadan vafot etganidan so‘ng boshlangan edi. Uning otasi konsern bilan kelishuv imzolashdan bosh tortib, Samsung xodimlari ichidan hamfikrlarini topgan hamda zararli ishlab chiqarish jarayonida xodimlari salomatligi uchun konsern mas’ulligini ta’minlashga yo‘naltirilgan harakat tashkil etgan edi.
Izoh (0)