Surxondaryo viloyati Termiz shahridagi Dehqon bozorida asal yarmarkalari tashkil etildi. Yarmarkada viloyatdagi asalarichilik bilan shug‘ullanuvchi tadbirkorlar o‘z mahsulotlarini ichki bozor bilan bir qatorda qo‘shni Afg‘oniston, Tojikiston va Turkmaniston bozorlariga taqdim qilinayotgan mahsulotlar to‘g‘risida ham fikr almashindi, Bu haqda “Daryo”ga viloyat bojxona boshqarmasi matbuot xizmati xabar berdi.

Unda soha mutaxassislari asalarichilik bilan shug‘ullanuvchi tadbirkorlar bilan suhbatda bo‘lishib, kelajakda asal eksportini yo‘lga qo‘yish xamda eksport operatsiyalari bo‘yicha ma’lumot berdilar.

“Surxon vohasidagi asalarichilik boshqa hududlarga nisbatan imkoniyati yuqori ekanligini, buning sababi esa voha iqlimi bir muncha iliqligi tufayli asalarilar boshqa viloyatdagi asalarilardan ko‘ra qishgi fasldan 20-45 kun ertaroq uyg‘onib, ko‘proq asal olish imkonini beradi. Asal eksport imkoniyatini yanada oshirish maqsadida viloyat hududida asalarichilikni sezilarli rivojlantirish va eksport qilish uchun kamida 10 ming gektargacha beda, qovun-tarvuz, makkajo‘xori, kungaboqar yoki gulchilik ekinlarini ko‘paytirish kerak, — deya ta’kidladi “Surxon asali” MChJ rahbari G‘.Begimov

Uchrashuvda bildirilgan takliflar tegishli mutasaddi tashkilotlar tomonidan o‘rganilib, uning yechimi yuzasidan o‘zlariga vazifalarni belgilab oldilar.