O‘zbekiston va Qozog‘iston kosmik sohada hamkorlik qiladi

O‘zbekiston va Qozog‘iston kosmik sohada hamkorlik to‘g‘risida memorandum imzoladi, deya xabar bermoqda “Podrobno.uz”.

O‘zbekiston Yer resurslari, geodeziya, kartografiya va davlat kadastri davlat qo‘mitasi va Qozog‘istonning “Qazaqstan G‘arish Sapari” kompaniyasi o‘rtasida imzolangan shartnoma yuqori aniqlikdagi sun’iy yo‘ldosh pozitsiyalash tizimini, yuqori va standart aniqlikda ishlovchi navigatsion qurilmalar, sun’iy yo‘ldosh navigatsiya uskunalarini tekshirish bo‘yicha laboratoriyalar tashkil etishni nazarda tutadi.

Bundan tashqari, tomonlar Qozog‘iston yerni masofadan zondlash kosmik tizimlaridan O‘zbekiston manfaatlari yo‘lida foydalanish, O‘zbekiston davlvat va mahalliy ijro hokimiyati organlari uchun geoportallar ishlab chiqish bo‘yicha ham hamkorlik qiladi.

Uchrashuv davomida tomonlar O‘zbekiston hududini kosmik monitoring qilish ishlarini Kazakh Export orqali moliyalashtirish imkoniyatlarini, shuningdek, ma’lumotlarni qabul qilish uchun O‘zbekistonning o‘zida stansiya tashkil etish masalalarini ham muhokam qilgan.

Qozog‘iston kompaniyasi O‘zbekiston tomoniga KazSeoSat kosmik apparatini ishlab chiqishda ishtirok etishni taklif qilgan.