O‘zbekiston jurnalistlari ijodiy uyushmasi Farg‘ona viloyat bo‘limi tashabbusi bilan jurnalistlar guruhi Qo‘shtepa tumani paxta dalalaridagi fermer va terimchilarga hasharga chiqdi. Bu haqda jurnalist Muhammadjon Obidov “Daryo”ga ma’lum qildi.
Xadichaxon “Oydin” gazetasining bosh muharriri. U oilaviy munosabatlar, vatanparvarlik, burch va huquq, ta’lim va tarbiya kabi mavzulardagi tahliliy maqolalari bilan o‘quvchilarga yaxshi tanish. U ham terimchilarga “hormang” deyishga chiqqan jurnalistlar bilan bir necha kundan buyon birga.
“Yoshligimda eng chaqqon terimchilardan biri edim. Shuning uchun hasharga chiqqan singil, dugonalarim bilan hamsuhbat yurib ham qisqa vaqtda 10—15 kilodan paxta terib qo‘yibman, — deydi Xadichaxon Karimova. — Qanday ajoyib xalqimiz bor, Langar mahallasining o‘zidan elikka yaqin uyda o‘tirgan ayol, vaqtincha ishsiz yoshlar o‘z ixtiyori bilan paxta terimiga chiqishibdi. Ulardagi oddiylik, insoniy burchni anglash va vatanparvarlik men yozadigan ocherkka mavzu bo‘ldi”.
“Vasiyeva Odinaxonman, Paxtakor mahallasida yashaymiz. Biz ham bitta ko‘chadan 15 nafar uyda o‘tirgan ayol basma-basiga musobaqalashib paxta teryapmiz, — deydi samimiyat bilan o‘rta yoshdagi ayol. — Jurnalist Xadichaxon opani yaxshi taniymiz. Maqolalari hayotiy, o‘qimishli. Men bugun Xadichaxon Karimova bilan bir soatcha yonma-yon yurib paxta terdim. Bilimli odamning suhbati ham yoqimli bo‘ladi-da. Rosa miriqdim. Ko‘nglim ko‘tarildi. Bunday paytda charchaganingni ham bilmas ekansan”.
Shu kuni dalaga chiqqan har bir jurnalist o‘nlab terimchiga hamsuhbat bo‘lib paxta terdi.
Izoh (0)