Pokiston Islom Respublikasining Islomobod, Peshovar, Karachi va boshqa hududlaridan 45 nafardan ortiq “Naqshbandiya” tariqati vakillari Surxondaryoning Termiz shahri, Termiz va Sherobod tumanlarida bo‘lib, muqaddas qadamjolarni ziyorat qildi. Bu haqda viloyat hokimligi matbuot xizmati xabar bermoqda.
Mehmonlar Termiz tumanidagi X asrda qurila boshlagan Sulton Saodat majmuasi hamda buyuk alloma al Hakim at-Termiziy ziyoratgohida bo‘lishib, bu yerdagi tarixiy yodgorliklar va muzeylar bilan yaqindan tanishdi. Shuningdek, ulamolar delegatsiyasi Sherobod tumanidagi ulug‘ muhaddis Abu Iso Muhammad at-Termiziy ansambliga ham tashrif buyurdi.
“Bu ziyoratlarni ko‘pdan buyon orzu qilardik. Nafaqat biz, balki ota-bobolarimiz ham Abu Iso at-Termiziy, Bahovuddin Naqshbandiy yurtida bo‘lib, qadamjolarini ko‘rishni, ziyorat qilishni niyat qilishgandi. Bu maqsadlarga biz yetishganimizdan mamnunmiz”, – deydi islomshunos olim, shayx Abdulhalim Tishti.
Delegatsiya tarkibida ommaviy axborot vositalari xodimlari ham bo‘lib, ular O‘zbekistondagi safar jarayonidagi voqeliklarni, hayratlarini o‘z nashrlarida muntazam yoritib bormoqda.
Pokistonlik mehmonlar joriy yilning 17-oktabriga qadar O‘zbekistonda bo‘lib, Qashqadaryo, Samarqand va Buxoroga ham safar qilishi belgilangan.
Izoh (0)