O‘zbekiston Chegara xizmati Shohimardon orqali Qirg‘izistonga chiqish tartibini tushuntirdi

O‘zbekiston Davlat xavfsizlik xizmati Chegara qo‘shinlari bosh shtabi Farg‘ona viloyatining Shohimardon anklavi orqali Qirg‘iziston kurort zonalariga chiqish tartibini tushuntirdi, deb yozadi “Gazeta.uz”.

“Oqqiya” o‘tkazish punkti orqali Shohimardon aholi punktiga quyidagi shaxslar o‘tkaziladi:

• Shohimardon aholi punktida doimiy yashovchi O‘zbekiston fuqarolari, shuningdek, ushbu aholi punkti hududi orqali tranzit bilan o‘tayotgan Qirg‘iziston fuqarolari — soddalashtirilgan tartibda, ya’ni sana shtampi qo‘ymasdan;
• Shohimardon aholi punktiga xizmat, sayyohlik va boshqa maqsadlarda ketayotgan O‘zbekiston fuqarolari — pasportga sana shtampi qo‘yilgan holda.

Shohimardon aholi punktida turib, Qirg‘iziston turistik zonalariga tashrif buyurmoqchi bo‘lgan shaxslar “Ko‘kko‘l” va “Dugoba” nazorat punktlari orqali soddalashtirilgan tartibda o‘tkaziladi.

O‘zbekiston va Qirg‘iziston turistik agentliklari o‘rtasidagi memorandumga ko‘ra, Qirg‘izistonda joylashgan “Ko‘k ko‘l” turzonasi, “Dugoba” alplageri va “Haydarkan” qishki hordiq zonasiga faqat tegishli turistik yo‘llanmaga ega bo‘lgan fuqarolargina tashrif buyurishi mumkin.