22-avgust kuni Fransiyadagi Oʻzbekiston elchixonasida Bosh vazir oʻrinbosari Aziz Abduhakimov Orex-Loisirs va SCP Geode fransuz kompaniyalari rahbariyati bilan uchrashdi. Bu haqda Bosh vazir o‘rinbosari “Daryo”ga ma’lum qildi.
Uchrashuv chog‘ida tomonlar Fransiyaning turizm va rekreatsion zonalar yaratish sohasida faoliyat yurituvchi yetakchi kompaniyalarini “Chorvoq” erkin turistik zonasini yaratish doirasida amalga oshirilayotgan loyihalarga jalb qilish masalalarini muhokama qildi. Mashhur mahalliy brendlarni jalb qilish, plyaj hordigʻi, suv sporti turlari, tibbiyot hamda ekstremal turizm bilan bogʻliq xizmat koʻrsatuvchi turistik obyektlarni yaratish, golf maydonlarini qurish, Chimyonda togʻ klasterini tashkil qilish kabilar shular jumlasidandir.
Muzokaralar yakunlariga koʻra, tomonlar 28—31-avgust kunlari Orex-Loisirs, SCP Geode, Compagnie des Alpes kabi fransuz kompaniyalari ekspertlarining Oʻzbekistonga tashrifini tashkillashtirishga kelishib oldi. Tashrif davomida “Chorvoq” erkin turistik zonasidagi loyihalarni amalga oshirish va aniq vazifalarni belgilab olishga doir muzokaralar oʻtkaziladi. Mazkur loyihalarni amalga oshirishda fransuz kompaniyalarining asosiy hamkorlari Oʻzbekiston Respublikasi Investitsiyalar boʻyicha davlat qoʻmitasi hamda Turizmni rivojlantirish davlat qoʻmitasi etib belgilandi.
Izoh (0)