Rossiyalik jurnalist Dmitriy Zaxarov “ORT” (Rossiya jamoatchilik telekanali) bosh direktori Vladislav Listyevning o‘ldirilishi ortida kim turgani borasida o‘z versiyasini aytib berdi, deb yozadi “RBK”.
Uning so‘zlariga ko‘ra, hammasiga o‘sha vaqtda telekanal rahbariyati tomonidan reklamaning barcha turlariga nisbatan e’lon qilingan moratoriy sabab bo‘lgan. Aynan o‘shanda, Zaxarovning versiyasiga ko‘ra, Listyevga bu moratoriyni bekor qilish talabi bilan tahdidli qo‘ng‘iroqlar boshlangan.
“OAVlar budjeti reklama orqali shakllanishi ma’lum bo‘lgach, reklama joylashtirishdan pul ishlamoqchi bo‘lganlar, vositachilar ko‘payib qoldi. Vladning ortida turganlar “Birinchi kanal” begona tashkilotlarning reklama joylashtirishiga qarshi moratoriy kiritadi, reklama bilan bevosita “Birinchi kanal” shug‘ullanishini aytadi. Mantiqan o‘ylab, bundan kim eng ko‘p zarar ko‘rganini aniqlash mumkin”, — dedi Zaxarov kanalning o‘rtacha bir yillik budjeti o‘sha vaqtda “chorak milliard dollar” bo‘lganini ta’kidlar ekan.
“Moratoriyni Vlad bekor qila olmasdi, chunki qarorni u qabul qilmasdi”, — deya davom etdi Zaxarov. Uning so‘zlariga ko‘ra, tahdidlardan keyin Listyev Federal xavfsizlik xizmati va Bosh prokuraturaga murojaat qilmagani va o‘zining xavfsizligini ta’minlashni talab qilmagani — uning eng katta xatosi bo‘lgan.
“Ushbu chorak milliard dollardan oladigan foizidan hozirda tirik bo‘lmagan, Londonda osilgan holda topilgan taniqli odam mahrum bo‘lgan”, — dedi Zaxarov. Uning fikricha, Boris Berezovskiy Rossiya birinchi prezidenti Boris Yelsinning qizi — Tatyana Dyachenkoning do‘sti bo‘lgani sababli, qotillik buyurtmachisi suvdan quruq chiqqan.
Vlad Listyev 1995-yil 1-mart kuni o‘z uyi podyezdi yonida otib tashlangan. Qotillik haligacha fosh qilinmagan.
Izoh (0)