Suriyada IShID guruhi tomonida jang qilgan 150 nafar qirg‘izistonlik halok bo‘lgan. Janglarda qatnashish uchun jami 850 kishi respublikani tark etgan. Bu haqda mamlakat Milliy xavfsizlik davlat qo‘mitasi Aksilterrorchilik markazi direktorining o‘rinbosari Qanjarbek Boqayev Jo‘qorg‘i Kengesh (Qirg‘iziston parlamenti) majlisida ma’lum qildi, deb yozadi EADaily.
Qo‘mita har bir holat yuzasidan alohida tekshiruv o‘tkazadi. Bokayev deputat Aysuluv Mamashova ko‘tarib chiqqan masalaga javoban oxirgi statistika ma’lumotlarini keltirib o‘tdi. Deputat Issiqko‘l viloyati Jetio‘g‘uz tumanidagi “Yaqin Inkar” taqiqlangan tashkiloti masjidi haqidagi masalani ko‘tardi. Qo‘mita bunday masjid mavjudligini rad etdi. Mamashova fikricha, bunday masjidlarning faoliyati Suriyaga jangarilarni yuborish bilan to‘g‘ridan to‘g‘ri bog‘langan.
Soufan Group (AQSh) tahliliy kompaniyasi ma’lumotiga ko‘ra, 2017-yilning oktabr holatiga Markaziy Osiyodan 4,2 ming kishi Suriya va Iroqdagi janglarda qatnashish uchun jo‘nab ketgan. Ulardan yuzlab nafari oxirgi vaqtlarda uyiga qaytgan. Statistikada birinchi o‘rinni O‘zbekiston egallagan (1,5 ming jangari). Ikkinchi o‘rindan Tojikiston (1,3 ming jangari) joy olgan. Qozog‘iston va Qirg‘izistondan urushga 500 nafardan odam, Turkmanistondan 400 kishi ketgan.
Izoh (0)