Surxondaryo viloyati Boysun tumani hududining xavfsizligini ta’minlash rejasiga asosan, 2018-yil 4—8-iyun kunlari Boysun tumani hududida maxsus-taktik o‘quv mashg‘uloti o‘tkazildi. Bu haqda viloyat IIB matbuot xizmati xabar berdi.
Surxondaryo viloyati IIB Harbiy safarbarlik bo‘limi xodimlari tomonidan joriy yilning 4—8-iyun kunlari 2018-yil uchun mo‘ljallangan o‘quv mashg‘ulotlari o‘tkazildi. Maxsus-taktik o‘quv mashg‘ulotida Surxondaryo viloyati Ichki ishlar boshqarmasining sohaviy xizmatlari, Milliy gvardiya, Mudofaa vazirligining Janubi-G‘arbiy maxsus harbiy okrugi Janubiy operativ yo‘nalishi guruhi, DXX Surxondaryo viloyati boshqarmasi, Davlat bojxona boshqarmasi, Prokuratura, Favqulodda vaziyatlar boshqarmasi, Chegara qo‘shinlari, hokimiyat va keng jamoatchilik vakillari ishtirok etdi.
Tadbir davomida Boysun tumani hududini har qanday ko‘rinishdagi huquqbuzarliklar va jinoyatlardan oldini olish, uyushgan guruhlar tomonidan tuman hududida jinoyat sodir etilmasligi, qurollangan jinoyatchilar tomonidan garovga olingan shaxslarni ozod etish, qo‘lbola portlovchi moddalarni aniqlanganda ularni joyida maxsus xodimlar tomonidan yo‘q qilish, fuqarolarni evakuatsiya qilish bo‘yicha amaliy va nazariy mashg‘ulotlar o‘tkazildi.
Shu qatorda Boysun tumanining Darband, Machay, Qizilnavr va Kengdala aholi yashash punktlarida Surxondaryo viloyati Ichki ishlar boshqarmasi va Milliy gvardiya shaxsiy tarkibi tomonidan tuzilgan maxsus guruhlar tomonidan aylanma yo‘llar, so‘qmoqlar, daryo yo‘llari, o‘zanlarda aniqlashtirish ishlari olib borildi.
Izoh (0)