Toshkentda 1-noyabrgacha pasportlarni ID-kartalar bilan almashtirish bo‘yicha sinov loyihasi joriy etiladi, deb yozadi Spot. Bu O‘zbekiston Prezidentining “Investitsion loyihalarni amalga oshirish va idoraviy axborot tizimlari jadal integratsiyalashuvining tashkiliy chora-tadbirlari to‘g‘risida”gi qarorida ko‘zda tutilgan.
Hujjatga ko‘ra, hozir amalda bo‘lgan pasportlar, tug‘ilganlik haqidagi guvohnomalar va shaxsni tasdiqlovchi boshqa hujjatlar (respublika ichida), haydovchilik guvohnomalari bundan mustasno, o‘rniga identifikatsiya kartalari (ID-kartalar) tizimi joriy qilinadi. Ularga har bir fuqaroning yagona identifikatsiya raqami, uning shaxsiy ma’lumotlari kiritiladi va davlat xizmatlarini olishda shaxsni aniqlash uchun foydalaniladi.
1-iyulgacha loyihani moliyalashtirish bo‘yicha takliflar kiritiladi, 1-avgustgacha esa uning texnik-iqtisodiy asosi tayyorlanadi.
1-noyabrgacha loyiha Toshkentda budjetdan tashqari mablag‘lar hisobidan sinov rejimida ishga tushiriladi.
Avvalroq O‘zbekistonda avtomobil raqamlari xalqaro raqamlarga almashtirilishi, barcha qog‘oz hujjatlar esa bekor qilinishi xabar berilgan edi.
Izoh (0)