Sirdaryoda tasodifan yong‘inga guvoh bo‘lib qolgan o‘t o‘chiruvchilar uch kishining hayotini saqlab qoldi

Joriy yilning 21-fevralida Sirdaryo viloyati IIB Yong‘in xavfsizligi boshqarmasi boshlig‘i o‘rinbosari Sherzod Abdullajonov hamda bo‘lim boshlig‘i Jahongir Ropiyev xizmat safari bilan Guliston shahridan Sirdaryo tumaniga ketayotgan chog‘ida Mirzaobod tumanining Oydin mahallasidagi uydan quyuq tutun chiqayotganini ko‘rib, yong‘inni o‘chirish uchun yordamga oshiqdi, deb xabar berdi O‘zA.

Ma’lum bo‘lishicha, yong‘in Obod ko‘chasidagi Qahramon Abdurahmonovga tegishli 43-uyda sodir bo‘lgan.

Oydin mahalla fuqarolar yig‘ini raisi Baxtiyor Sobirov o‘t o‘chirish guruhiga xabar berilganini aytgan.

Yong‘in 43-uy bilan bir tom ostidagi 42-uyga ham o‘tib ulgurgan. Shu payt u yerdan yordam so‘rab baqirgan ovoz eshitilgan. Mayor Sherzod Abdullajonov va podpolkovnik Jahongir Ropiyevlar kuchli olov va nafas olishga imkon bermayotgan quyuq tutunga qaramay, o‘t o‘chirish jangovar guruhini ham kutmasdan, eshikni buzib ichkariga kirgan.

Yong‘in xavfsizligi xodimlarining tezkor harakatlari natijasida Obod ko‘chasi 42-uyda yashovchi, 1957-yilda tug‘ilgan Usmon Xo‘jaqulov, uning turmush o‘rtog‘i hamda kelinining  hayoti saqlab qolingan.