Samarqand viloyatida avtomobil davlat raqamlarini o‘g‘irlab, ularni qaytarib berish uchun pul talab qilayotgan firibgarlar guruhi paydo bo‘ldi. Tovlamachilar bunday “xizmat” uchun 5 dollar tovon puli talab qilyapti, deya xabar beradi “Xalq so‘zi”.
Samarqand viloyatida yashovchi va UzNews nashriga murojaat qilgan jabrlanuvchiga ko‘ra, u 12-fevral kuni o‘z uyidan uncha uzoq bo‘lmagan joyda qoldirgan Lasetti avtomashinasida davlat raqamlari yo‘qligi, yon qismida qirilgan joylar paydo bo‘lganini payqab qoladi. Bundan tashqari, old oynasi tomonda Qiwi-hamyon orqali tovon to‘lashi shartligi to‘g‘risida quyidagi mazmunda xat qoldirilganini ko‘radi.
“Avtomobilingiz raqamini qaytarib olishni istasangiz, quyidagilarni bajaring:
+77762599592 QIWI-elektron hamyoniga 5 dollar ( so‘m yoki rubl emas) yuboring. Buni O‘zbekistondagi xohlagan bankda amalga oshirish mumkin;
Jo‘natishingiz bilan @urustama telegram manzili yoki rustammalikov@yandex.ru elektron pochtasiga yozing;
Agar bularning barchasini qilsangiz, davlat inspeksiyasi, YHHB, militsiyaga ariza berishga ketadigan vaqt va kuchingizni tejagan bo‘lasiz.
Bunday noqulaylik uchun uzr so‘raymiz. Pulingizning yarmi xayrli ishlar (mehribonlik uylari, kam ta’minlanganlar, yetimxonalar)ga sarflanadi”.
O‘g‘rilar esa ushbu to‘lov amalga oshirilgandan so‘ng bir sutka davomida davlat raqami qoldirib ketilgan aniq manzilni yuborishni va’da bergan.
Manbaga ko‘ra, oxirgi paytda Samarqandda avtomobil davlat raqamlarini o‘g‘irlash bilan bog‘liq 30 ta holat kuzatilgan.
Izoh (0)