Shavkat Mirziyoyev — shayx Muhammad Sodiq Muhammad Yusuf haqida: “U kishiga tuhmat, g‘iybatlar ko‘p bo‘lgan”

O‘zbekiston Prezidenti Shavkat Mirziyoyev 9-fevral kuni Toshkent shahar Olmazor tumani faollari bilan bo‘lib o‘tgan yig‘ilishda marhum shayx Muhammad Sodiq Muhammad Yusuf haqida iliq fikrlarni bildirib o‘tdi. Prezidentning yig‘ilishdagi so‘zlari 11-fevral kuni “O‘zbekiston 24”ning “Tahlilnoma” dasturida e’lon qilindi.

Shayx Muhammad Sodiq Muhammad Yusuf hazratlarini juda hurmat qilardim, ko‘p uchrashib yurardim. O‘zim ko‘p muloqotda bo‘lganman. U juda ko‘p kitob o‘qigan inson edi. Ular: “Kitob o‘qimagan odamning ruhiyati ham, kelajagi ham, umuman umidi ham yo‘q”, derdilar.

U kishi arab tilini juda mukammal bilar edi. Imom al-Buxoriy, Moturidiy, Marg‘inoniy, Termiziylar haqida gapiramiz. Lekin mustaqil O‘zbekistonda ham shunday odamlar bo‘lgan, bu odam juda aqlli bo‘lgan.

O‘rta Osiyo va Qozog‘iston musulmonlari idorasining raisi, muftiy lavozimida ishlagan. O‘sha payt sobiq Ittifoqdan Hajga eng ko‘pi bilan 20 kishi borgan. Lekin 1990-yili O‘rta Osiyo va Qozog‘istondan 500 nafar musulmonni O‘zbekistondan jo‘natishga bosh-qosh bo‘lgan. 90-yillari Saudiya podshohligiga borib, 1 million nusxa Qur’onni olib keltirgan.

Hayot beshafqat bo‘ladi deganlaridek, u odamga ham tuhmat, g‘iybatlar ko‘p bo‘lgan. 1993-yili ko‘chib ketishga majbur bo‘ladi. Saudiya Arabistonida yashaganlar, keyin 1994-yil Liviyaga borib, 2001-yilgacha o‘sha yerda musofirchilikda yashab, ko‘p kitoblar yozganlar. Ochig‘ini aytsak, Erkin Vohidov, Abdulla Oripov, shayx Muhammad Sodiq Muhammad Yusufga o‘xshagan buyuk odamlar hozir yetishmayapti.

Qur’onni o‘qigan va uni ilmiy bilgan odam hech qachon kam bo‘lmaydi. U odamning bilganini ancha-muncha odam bilmasdi. Bundan tashqari, u odam kam uxlab, ko‘p yozib, o‘qir edi. Har kuni ikki soat sport bilan shug‘ullanardi. Biz mana shunday buyuk odamlarimizni tarannum qilsak kam bo‘lmaymiz. Kitoblarni arab, fors tillaridan o‘zbek tiliga tarjima qildirgan odam. Qani bizda hozir shunaqalar?..

Ko‘p niyat qilardilar, “Qani endi bizning davlatda ham yaxshi masjid bo‘lsa-da, nurli islomni men tushuntirsam”, deb. Shuning uchun yangi barpo etiladigan masjidga shayx Muhammad Sodiq Muhammad Yusuf nomi beriladi, u yerda muzey tashkil qilinadi. Bu insonni ham tarannum qilsak, o‘ylaymanki, bu o‘z tariximizga, millatimizga, mamlakatimizga, xalqimizga bo‘lgan e’tibor bo‘lardi.

Shavkat Mirziyoyev, O‘zbekiston Prezidenti