Venesuelada Niderlandiyaning oroliga o‘tish chog‘ida cho‘kib ketganlar xotirasiga motam e’lon qilindi

Venesuelaning Falkon shtati gubernatori Viktor Klark Niderlandiyaning Kyurasao oroliga o‘tishga urinish chog‘ida dengizda cho‘kib ketgan kishilar xotirasi uchun uch kunlik motam e’lon qildi. Bu haqda “Izvestiya” xabar bermoqda.

So‘nggi ma’lumotlarga ko‘ra, venesuelalik qochoqlar bo‘lgan kichik qayiq orol sohili yaqinidagi qoyalarga urilishi oqibatida 5 kishi halok bo‘lgan, 16 kishi omon qolgan.

Qayiqda jami 30 kishi bo‘lgan, qolganlarning taqdiri hozircha noma’lum.

O‘tgan hafta rasmiylar Venesuela yaqinidagi Niderlandiyaga tegishli Aruba, Kyurasao va Boneyr orollariga nisbatan transport qamali joriy etgan edi.

Bu chora Venesueladan mahsulotlar olib chiqib ketilishiga qarshi kurash bilan izohlandi.