“Layk” uchun hayot: To‘g‘ridan-to‘g‘ri efirdagi 5 ta fojia

Selfi olishga urinish tufayli fojiali o‘lim holatlari tarixi allaqachon bir necha yilni o‘z ichiga oladi. Ilk bor ana shunday holat 2011-yilda yuz bergan edi. O‘shanda uch nafar amerikalik o‘smir asablari bardoshliligini sinab ko‘rish va yo‘lda suratga olishga urinib, poyezd ostida qolgan edi.

Shundan buyon kuchli taassurot qoldiradigan surat olishga urinib halok bo‘lganlar ro‘yxati muntazam to‘lib bormoqda. Kishilar rulda selfi olishga urinib, YTHga uchramoqda, yuqoriroqqa (tog‘, ko‘prik yoki zina) chiqishga urinib muvozanatni yo‘qotib, qulamoqda. Bunga yana qo‘lida telefon bilan cho‘kib ketganlar, yovvoyi hayvonlar hujumiga uchraganlar, tok urishi oqibatida halok bo‘lganlarni qo‘shish mumkin.

Qurolga egalik qilishga ruxsat berilgan mamlakatlarda esa to‘pponcha yoki qurollar bilan suratga tushayotib, tasodifan o‘zini otib qo‘yish holatlari uchraydi. 2011-yildan buyon dunyoda selfi vositasida ijtimoiy tarmoqlarda o‘zini ko‘z-ko‘z qilishga urinishlar bilan bog‘liq o‘lim holatlari 150 tani tashkil etdi.

Muhabbat va fojia

Xutoylik mashhur rufer Vong Yon Nin osmono‘par bino tomidan qulab tushib, halok bo‘ldi. Nin anchadan buyon xavfli tryuklarga ixtisoslashgan va buning ortidan ijtimoiy tarmoqlarda mashhurlikka erishgan edi.

Yigit bu safar Xitoy janubidagi Chansha shahrida joylashgan osmono‘par binoga chiqishga qaror qildi. Buning evaziga u 15 ming dollarni qo‘lga kiritishi kerak edi. Pullar ruferga to‘yini tashkillashtirish uchun kerak edi — u sevgan qiziga turmush qurishni taklif qilmoqchi edi.

Vong Yon Nin osmono‘par bino tomida 50 soniya davomida tomga osilib o‘zini ko‘tardi, biroq oxirgi urinish muvaffaqiyatsiz bo‘ldi — yigitning oyoqlari baland bino oynasida sirpanib, u pastga qulab ketdi.

To‘g‘ridan-to‘g‘ri efir chog‘idagi o‘lim

Tatariston posyolkalaridan birining 23 yoshli fuqarosi Sitora Baratova ijtimoiy tarmoqlarda translyatsiyalar uyushtirishni juda xush ko‘rardi. Bir kuni u avtomobil boshqara turib, to‘g‘ridan-to‘g‘ri efirga chiqishga qaror qildi.

U smartfoni ekraniga qarashni ma’qul ko‘rib, yo‘lga ko‘p e’tibor qaratmadi. Biroq obunachilari bilan suhbatlashishga muvaffaq bo‘lmadi: bir daqiqalik videoyozuv davomida Sitora faqat salomlashish va “Kim nima bilan band? Kim nima bilan shug‘ullanmoqda? Kim qayerga ketayapti?” deb so‘rashga ulgurdi.

Shundan so‘ng u yo‘l-transport hodisasiga uchradi. Uning Daewoo Matiz avtomobili “PAZ” avtobusi bilan to‘qnashib ketdi: qiz halok bo‘ldi, avtobusning besh nafar yo‘lovchisi jabrlandi.

Katta tezlikdagi selfi

O‘ziga xos uslubdagi selfi olishga urinish tufayli yuz bergan YTH mashhur reper Jadiel’ning hayotiga zomin bo‘ldi. Yigit mototsiklda harakatlana turib selfi olishga qaror qildi. Yo‘ldan chalg‘igan yigit yonidan o‘tayotgan avtomobilga urildi. Reper shifoxonada halok bo‘ldi.

Sinfdoshlar havasini keltirish uchun

17 yoshli peterburglik Kseniya Ignatyeva g‘aroyib surati bilan sinfdoshlarini hayratga solishga qaror qildi. U suratga tushish joyi sifatida Rossiya shimoliy poytaxtidagi eng mashhur joylardan biri — Temiryo‘l ko‘prigini tanladi. G‘oya bo‘yicha, Kseniya qush parvozi balandligidan Peterburg fonida suratga tushishi kerak edi. Maktab o‘quvchisi toyib ketdi va pastga qulay turib, yuqori voltli kabelni ushlab qolishga urindi va shu zahoti halok bo‘ldi.

Kulgili chiqmadi

Bir necha yil avval Facebook foydalanuvchilari #selfieolympics fleshmobini yo‘lga qo‘ydi. Chetdan qaraganda bu marafonni eslatar edi, eng mantiqqa to‘g‘ri kelmaydigan selfini yaratgan odam unda g‘olib bo‘lar edi. 18 yoshli Oskar Reyya o‘yinga berilib ketdi.

Uning birinchi marafon selfisi shunchalik ko‘p “layk” to‘pladiki, yigit to‘xtamaslikka qaror qildi. O‘smir keyingi kuni yanada provokatsion surat olishga urindi, biroq urinish o‘lim bilan yakun topdi: Oskar suratga tushish chog‘ida osilib turishga uringan eshikdan yiqilib tushdi, boshi yorilib, qon yo‘qotishdan halok bo‘ldi.