O‘zbekiston Prezidentining tashabbusi bilan ishlab chiqilgan Nukusning bosh rejasi shaharni 2035-yilgacha ijtimoiy-iqtisodiy rivojlantirish, infratuzilma va aholi turar-joy sharoitini yaxshilashga qaratilgan keng ko‘lamli bunyodkorlik loyihalarini qamrab olgan, deb xabar berdi O‘zA.
Shavkat Mirziyoyev joriy yil yanvar oyida Qoraqalpog‘iston Respublikasiga tashrifi chog‘ida Nukusning Yernazar Olako‘z ko‘chasini rekonstruksiya qilish loyihasi bilan tanishib, uni yanada takomillashtirish bo‘yicha zarur taklif va tavsiyalarni bergan edi.
Rejaga ko‘ra, ushbu markaziy ko‘cha kengaytirilib, transport harakati uchun yanada qulaylik yaratiladi. Yo‘l bo‘yida ko‘p qavatli uylar, savdo va maishiy xizmat ko‘rsatish shoxobchalari quriladi.
Ayni paytda bu yerda zamonaviy loyihalar asosida 5 qavatli 30 turar joy binosi qurib bitkazilmoqda. Imtiyozli ipoteka krediti asosida beriladigan ushbu uylarda yashash uchun barcha qulayliklar yaratiladi. Uylar 2018-yilda foydalanishga topshiriladi. Kelasi yili ushbu ko‘chada yana 20 uy quriladi.
Shaharning Abdamboyev ko‘chasida ham arzonlashtirilgan uylardan iborat turar-joy massivi barpo etilmoqda. Joriy yilda qurilgan ko‘p qavatli 7 uy shu kunlarda o‘z egalariga topshirilmoqda.
Massivda zamonaviy mahalla markazi, xizmat ko‘rsatish shoxobchalari, go‘zallik saloni, mini-bank, bolalar o‘yin maydonchalari barpo etiladi, hudud obodonlashtiriladi.
Mavzuga doir: Shavkat Mirziyoyev Nukusda bunyod etilgan ixtisoslashtirilgan oliy sport mahorati maktabi faoliyati bilan tanishdi
Toshkent pediatriya-tibbiyot instituti Nukus filiali shifoxonasida amalga oshirilayotgan bunyodkorlik va rekonstruksiya ishlari, Ajiniyoz nomidagi Nukus davlat pedagogika institutining yangi bosh o‘quv binosini qurish, Dian-plast mas’uliyati cheklangan jamiyati tomonidan yumshoq yuk konteynerlari ishlab chiqarish loyihalari bilan ham tanishib, mutasaddilarga bu boradagi topshiriq va ko‘rsatmalarini berdi.
Izoh (0)